ગુજરાતના સરહદી જિલ્લા એવા બનાસકાંઠાના અંતરિયાળ અને પહાડી વિસ્તાર ગણાતા હડાદ તાલુકા તેમજ તેની આસપાસના ગ્રામ્ય વિસ્તારોમાં વાતાવરણમાં અચાનક ભારે પલટો જોવા મળ્યો હતો. દિવસભરના અસહ્ય ગરમી અને અકળાવનારા ઉકળાટ બાદ બપોર પછી અચાનક આકાશ કાળાડિબાંગ વાદળોથી ઘેરાઈ ગયું હતું. જોતજોતામાં સમગ્ર હડાદ પંથકમાં તીવ્ર ગતિએ ફૂંકાયેલા વાવાઝોડા સાથે કમોસમી વરસાદનું આગમન થયું હતું. આ વરસાદ સામાન્ય નહોતો, પરંતુ તેની સાથે મોટા કદના કરા પણ પડ્યા હતા, જેને કારણે સ્થાનિક લોકોમાં ભારે આશ્ચર્ય અને ફફડાટ ફેલાયો હતો.

ભારે ગાજવીજ અને આકાશમાં વીજળીના કડાકા-ભડાકા સાથે પડેલા આ વરસાદને કારણે હડાદ ગામના મુખ્ય માર્ગો પર જોતજોતામાં નદીઓની જેમ પાણી વહેતા થઈ ગયા હતા. રસ્તાઓ પર પાણી ભરાઈ જવાના કારણે વાહનવ્યવહારને ભારે માઠી અસર પહોંચી હતી. આ કમોસમી વરસાદથી વાતાવરણમાં એકાએક ભારે ઠંડક પ્રસરી ગઈ હતી, જેનાથી લોકોને ગરમીમાંથી મોટી રાહત મળી હતી. જો કે, આ વરસાદ ખેડૂતો માટે આફત બનીને આવ્યો છે. સ્થાનિક કૃષિ નિષ્ણાતોના જણાવ્યા અનુસાર, આ વિસ્તારમાં વાવવામાં આવેલા ઉનાળુ પાકો જેવા કે બાજરી, તલ અને શાકભાજીના પાકને આ અણધાર્યા વરસાદ અને કરાના કારણે વ્યાપક નુકસાન  થવાની પૂરેપૂરી સંભાવના છે, જેને લીધે સ્થાનિક ખેડૂતો ભારે ચિંતિત બન્યા છે.

બનાસકાંઠાની સાથે જ પડોશી જિલ્લા સાબરકાંઠામાં પણ મેઘરાજાએ રૌદ્ર સ્વરૂપ ધારણ કર્યું હતું. સાબરકાંઠાના આદિવાસી બહુલ વિસ્તાર એવા પોશીના તાલુકામાં બપોર પછી વાતાવરણ પલટાયું હતું. ભારે ઉકળાટ અને અસહ્ય બફારાથી ત્રસ્ત નાગરિકો હજી ગરમીનો સામે કરી રહ્યા હતા ત્યાં જ વિજળીના ગડગડાટ સાથે ધોધમાર વરસાદ શરૂ થઈ ગયો હતો. પોશીના કેન્દ્ર ઉપરાંત આસપાસના અંતરિયાળ ગામો જેવા કે દેલવાડા આંબા મહુડા, ગણેર , અને છોછરમાં પણ પવનના સુસવાટા સાથે ભારે વરસાદ નોંધાયો હતો.

આ સમગ્ર વિસ્તાર ગુજરાત અને રાજસ્થાનની સરહદ પર આવેલો હોવાથી સરહદી પટ્ટાના તમામ ગામોમાં એકસાથે કુદરતનો પ્રકોપ જોવા મળ્યો હતો. પોશીનાના મુખ્ય બજારો અને ગ્રામ્ય રસ્તાઓ પર એટલી ઝડપે પાણી વહેવા લાગ્યા હતા કે જાણે રસ્તાઓ જ નાની નદીઓમાં ફેરવાઈ ગયા હોય તેવા દ્રશ્યો સર્જાયા હતા. આ ઉપરાંત સાબરકાંઠાના અન્ય રમણીય પંથક એવા વિજયનગર ને તેની આસપાસના જંગલ વિસ્તારોમાં પણ અચાનક મેઘમહેર થઈ હતી. વિજયનગરના ગ્રામ્ય વિસ્તારો જેવા કે ખોખરા, ટીંટારણ અને નાલશેરી માં કમોસમી વરસાદના જોરદાર ઝાપટાં પડ્યા હતા. આ કમોસમી વરસાદને કારણે સમગ્ર વિજયનગર પંથકમાં શીતલહેર પ્રસરી ગઈ હતી અને તાપમાનમાં મોટો ઘટાડો નોંધાયો હતો.

મધ્ય ગુજરાતના પંચમહાલ જિલ્લામાં વાતાવરણનો મિજાજ તદ્દન અલગ અને ભયાનક જોવા મળ્યો હતો. પંચમહાલના મોરવા હડફ પંથકમાં દિવસભર સૂર્યદેવે અગનગોળા વરર્સાવ્યા હતા, જેના કારણે નાગરિકો અસહ્ય ગરમીથી તોબા પોકારી ઉઠ્યા હતા. પરંતુ સાંજના સમયે વાતાવરણમાં અચાનક જ મોટો પલટો આવ્યો હતો. આકાશમાં ધૂળની ડમરીઓ ઉડવા લાગી હતી અને જોતજોતામાં સમગ્ર પંથક ભારે ધૂળિયા વાવાઝોડાની ઝપેટમાં આવી ગયો હતો. ભારે પવનના સુસવાટા સાથે ત્રાટકેલા આ વાવાઝોડાના કારણે સમગ્ર વિસ્તારમાં અંધારપટ જેવી સ્થિતિ સર્જાઈ ગઈ હતી.

માર્ગો પર ધૂળની પ્રચંડ ડમરીઓ ઉડવાના કારણે વિઝિબિલિટી ખૂબ જ ઘટી ગઈ હતી, જેને લીધે વાહનચાલકો રસ્તા પર જ અટવાઈ પડ્યા હતા અને વાહનો ચલાવવામાં ભારે મુશ્કેલીનો સનમુખ થવું પડ્યું હતું. તીવ્ર પવનના કારણે અનેક સ્થળોએ વૃક્ષો અને હોર્ડિંગ્સ ધરાશાયી થવાના અહેવાલો પણ સાંપડ્યા છે. આ પ્રચંડ પવન અને વાવાઝોડાના કારણે મોરવા હડફ પંથકમાં વીજ કંપનીની લાઈનોમાં ટેકનિકલ ખામી સર્જાતા સમગ્ર પંથકનો વીજ પુરવઠો સંપૂર્ણપણે ખોરવાઈ ગયો હતો. લાંબા સમય સુધી વીજળી ગુલ રહેવાના કારણે લોકોને હાલાકી ભોગવવી પડી હતી. વાવાઝોડા બાદ આ વિસ્તારમાં પણ વરસાદના આગમન જેવો જ માહોલ સર્જાયો હતો અને આકાશ વાદળોથી ઘેરાયેલું રહ્યું હતું.

પંચમહાલની સરહદે આવેલા મહીસાગર જિલ્લામાં પણ કુદરતી વાતાવરણમાં મોટો ફેરફાર નોંધાયો હતો. મહીસાગરના સરહદી અને ડેમ વિસ્તાર ગણાતા કડાણા તેમજ  ઐતિહાસિક નગર સંતરામપુર માં સાંજના સમયે અચાનક પવનની ગતિમાં ભારે વધારો થયો હતો. સંતરામપુર, લુણાવાડા અને કડાણા સહિતના વિસ્તારોમાં તીવ્ર ઠંડા પવનના સુસવાટા ફૂંકાવવાના શરૂ થયા હતા. આ ઠંડા પવનની સાથે જ જિલ્લાના વિવિધ ભાગોમાં કમોસમી વરસાદી ઝાપટાં પડવાનું શરૂ થયું હતું.

આ અણધાર્યા વરસાદી ઝાપટાંના કારણે વાતાવરણમાં ફેલાયેલી ગરમી પળવારમાં ગાયબ થઈ ગઈ હતી અને વાતાવરણ એકદમ આહલાદક અને ઠંડુ બની ગયું હતું. જો કે, પવનની ગતિ વધુ હોવાના કારણે ખેતરોમાં ઉભા પાકને આંચકો લાગ્યો છે. લુણાવાડા અને સંતરામપુરના બજારોમાં અચાનક આવેલા આ વરસાદના કારણે ખુલ્લામાં રાખેલો માલસામાન પલળી ગયો હોવાના અહેવાલો છે, જેનાથી વેપારીઓને પણ આંશિક નુકસાન વેઠવાનો વારો આવ્યો છે.

ઉત્તર અને મધ્ય ગુજરાત બાદ કમોસમી વરસાદની આ આફત સૌરાષ્ટ્ર  તરફ આગળ વધી હતી. સૌરાષ્ટ્રના પ્રવેશદ્વાર સમાન અમરેલી  જિલ્લાના વાતાવરણમાં પણ અણધાર્યો પલટો આવ્યો હતો. અમરેલી જિલ્લાના ધારી પંથકના ખડ ખંભાળિયા અને તેની આસપાસના ગ્રામ્ય વિસ્તારોમાં બપોર પછી કડાકા-ભડાકા સાથે વરસાદનું આગમન થયું હતું. અહીં પણ કુદરતે રૌદ્ર રૂપ બતાવતા કરા સાથે વરસાદ ખાબક્યો હતો, જેના કારણે ઉનાળાની ઋતુમાં ચોમાસા જેવો અદ્ભુત અને ભયાવહ માહોલ જોવા મળ્યો હતો.

આ ઉપરાંત અમરેલીના બાબરા તાલુકામાં અને તેના નજીકના અમરાપુર પંથકમાં પણ મેઘરાજાએ ધમાકેદાર એન્ટ્રી કરી હતી. ભારે ઉકળાટ અને અસહ્ય ગરમીથી ત્રસ્ત થયેલા સ્થાનિક લોકોને આ વરસાદી ઝાપટાંથી મોટી રાહત મળી હતી અને સમગ્ર પંથક ઠંડોગાર થઈ ગયો હતો. સૌરાષ્ટ્રના આ વિસ્તારોમાં ખેડૂતો હાલમાં આગામી ચોમાસાની ખેતીની તૈયારીઓ કરી રહ્યા છે, તેવા સમયે આ વરસાદ પડતાં કેટલાક વિસ્તારોમાં ખેડૂતોમાં નવી આશા જાગી છે, તો બીજી તરફ ખુલ્લા ખેતરોમાં પડેલા ઘાસચારાને નુકસાન થવાની ભીતિ પણ સેવાઈ રહી છે.

સૌરાષ્ટ્રના અન્ય મહત્વના જિલ્લા એવા જામનગરના કાલાવડ પંથકમાં પણ છેલ્લા ત્રણ દિવસથી બપોર પછી વાતાવરણમાં પલટો આવવાનો સિલસિલો યથાવત રહ્યો છે. કાલાવડના નીકાવા ગામ અને તેની આસપાસના વિસ્તારોમાં આજે પણ આકાશમાં ઘેરાયેલા મેઘાડંબર વચ્ચે જોરદાર વરસાદી ઝાપટું પડ્યું હતું. સતત બદલાઈ રહેલા આ વાતાવરણના કારણે મિશ્ર ઋતુનો અહેસાસ થઈ રહ્યો છે.

બીજી તરફ, રાજકોટ જિલ્લાના જસદણ પંથકમાં પ્રચંડ કમોસમી વરસાદી માહોલ જોવા મળ્યો હતો. જસદણ તાલુકાના વીરનગર, આટકોટ , જીવાપર અને કમળાપુર જેવા મોટા ગામોમાં ગાજવીજ સાથે વરસાદી ઝાપટાં પડ્યા હતા. આ જસદણ તાલુકાના ભંડારીયા ગામમાં તો કુદરતનો પ્રકોપ ચરમસીમાએ પહોંચ્યો હતો. ભંડારીયા ગામમાં વીજળીના ભયાનક ભડાકા અને કડાકા સાથે મોટા કદના કરા સાથે કમોસમી વરસાદ ખાબક્યો હતો. કરા પડવાના કારણે ઘરોના પતરા અને ખેતરોમાં ઉભેલા પાકને ભારે નુકસાન થયું હોવાના અહેવાલ છે. ઉકળાટ બાદ અચાનક ત્રાટકેલા આ વરસાદથી સમગ્ર રાજકોટ ગ્રામ્ય વિસ્તારમાં ઠંડક તો પ્રસરી ગઈ છે, પરંતુ કમોસમી માવઠાના આ મારથી જગતનો તાત સંપૂર્ણપણે લાચાર બની ગયો છે