​મહેસાણા: ગુજરાતમાં પ્રેમલગ્ન અને લગ્ન નોંધણી (Marriage Registration)ના કાયદામાં સુધારા કરવાની માંગ સાથે સરદાર પટેલ ગ્રુપ (SPG)ના અધ્યક્ષ લાલજી પટેલે સરકાર સામે મોરચો માંડ્યો છે. મહેસાણા ખાતેથી રાજ્ય સરકારને આકરા શબ્દોમાં અલ્ટીમેટમ આપતા તેમણે જણાવ્યું હતું કે, જો ૨૦૨૭ની વિધાનસભા ચૂંટણી પહેલાં લગ્ન નોંધણીના કાયદામાં માતા-પિતાની સહી અને સંમતિ ફરજિયાત બનાવતો સુધારો લાવવામાં નહીં આવે, તો શાસક પક્ષે આગામી ચૂંટણીમાં તેના ગંભીર પરિણામો ભોગવવા માટે તૈયાર રહેવું પડશે.  

​લાલજી પટેલે કાયદાકીય છટકબારીઓનો વિરોધ કરતાં જણાવ્યું હતું કે, હાલમાં ગામડાઓમાં તલાટી કક્ષાએ કે સરળતાથી થઈ જતી લગ્ન નોંધણીના કારણે અનેક દીકરીઓ અને તેમના માતા-પિતા વિષમ પરિસ્થિતિમાં મુકાય છે. આથી લગ્ન નોંધણીની પ્રક્રિયા તલાટી કક્ષાએથી હટાવીને મામલતદાર અથવા કલેક્ટર કક્ષાની જવાબદાર ઓફિસમાં ટ્રાન્સફર કરવી જોઈએ. આ ઉપરાંત, કોઈ પણ યુવક-યુવતી લગ્ન નોંધણી કરાવે ત્યારે તેમના માતા-પિતાની લેખિત મંજૂરી અને જાણકારી હોવી અત્યંત જરૂરી છે.  

​SPGના અધ્યક્ષે આક્રોશ વ્યક્ત કરતા ઉમેર્યું હતું કે, આ મુદ્દો કોઈ એક સમાજ પૂરતો સીમિત નથી પરંતુ તમામ વર્ગના માતા-પિતા અને યુવતીઓની સુરક્ષા સાથે જોડાયેલો છે. જો સરકાર આ મામલે વહેલી તકે કાયદાકીય પ્રક્રિયા હાથ નહીં ધરે, તો ગાંધીનગર ખાતે વિશાળ રેલી યોજીને ઉગ્ર આંદોલન કરવામાં આવશે.  
​ઉલ્લેખનીય છે કે, રાજ્યમાં લગ્ન નોંધણી નિયમોમાં ફેરફાર અને પિડિત પરિવારજનોને રક્ષણ આપવા બાબતે લાંબા સમયથી માંગણીઓ થઈ રહી છે. ત્યારે ૨૦૨૭ની આગામી ચૂંટણીનો ઉલ્લેખ કરીને લાલજી પટેલે આપેલા આ સીધા ચેતવણીભર્યા નિવેદનથી રાજ્યના રાજકારણમાં અને પાટીદાર સમાજ સહિતના વિવિધ વર્ગોમાં ભારે ચર્ચા જાગી છે.