અમદાવાદ, તા.૫ : પાલીતાણા ખાતે યોજાનારી પરંપરાગત ફાગણ ફેરીને ધ્યાનમાં રાખી પશ્ચિમ રેલવેએ યાત્રાળુઓ માટે ખાસ ભેટ આપી છે. રેલવે દ્વારા બાંદ્રા ટર્મિનસથી પાલીતાણા વચ્ચે સ્પેશિયલ ટ્રેન દોડાવવાનો નિર્ણય લેવાયો છે. 

ફાગણ ફેરી દરમિયાન દર વર્ષે મોટી સંખ્યામાં શ્રદ્ધાળુઓ પાલીતાણા શેત્રુંજય ગિરિરાજની યાત્રાએ આવે છે. યાત્રિકોની ભીડ અને સુવિધાને ધ્યાનમાં લઈને પશ્ચિમ રેલવેએ આ વિશેષ ટ્રેન શરૂ કરવાનું આયોજન કર્યું છે. આ સ્પેશિયલ ટ્રેનથી મુંબઈ અને આસપાસના વિસ્તારોમાંથી આવતા ભાવિકોને પાલીતાણા પહોંચવામાં સરળતા રહેશે.

રેલવે તંત્ર દ્વારા ટ્રેનના સમયપત્રક, સ્ટોપેજ અને બુકિંગની વિગતો ટૂંક સમયમાં જાહેર કરવામાં આવશે. ફાગણ ફેરી નિમિત્તે દોડનારી આ વિશેષ ટ્રેનથી હજારો યાત્રાળુઓને સીધો લાભ મળશે અને યાત્રા વધુ સુગમ બનશે.