વડોદરાના મકરપુરા પાસે ગંભીર અકસ્માત: ST બસની અડફેટે બાઇક ચાલક યુવકનું ઘટનાસ્થળે જ કરૂણ મોત
મણેજા ગામમાં રહેતા યુવકની બાઇકને એસ.ટી. બસે જોરદાર ટક્કર મારી; અકસ્માત બાદ સ્થાનિકોમાં ભારે આક્રોશ, પોલીસે ડ્રાઇવર સામે તપાસ હાથ ધરી
વડોદરા: વડોદરા શહેરના મકરપુરા વિસ્તારમાં ફરી એકવાર તેજ રફ્તાર એસ.ટી. બસે એક નિર્દોષ યુવકનો ભોગ લીધો છે. માણેજા ગામના યુવકનું એસ.ટી. બસની ટક્કરે ગંભીર ઈજાઓ પહોંચતા ઘટનાસ્થળે જ કરૂણ મોત નીપજ્યું હતું. આ બનાવને પગલે વિસ્તારમાં અરેરાટી વ્યાપી ગઈ હતી અને સ્થાનિક લોકોના ટોળાં એકઠા થઈ ગયા હતા.
મળતી માહિતી મુજબ, મણેજા ગામનો રહેવાસી યુવક પોતાની બાઇક લઈને મકરપુરા રોડ પરથી પસાર થઈ રહ્યો હતો. તે દરમિયાન પૂરપાટ ઝડપે આવી રહેલી GSRTC (ગુજરાત રાજ્ય માર્ગ વાહન વ્યવહાર નિગમ)ની એસ.ટી. બસે બાઇકને જોરદાર અડફેટે લીધી હતી. ટક્કર એટલી ભયાનક હતી કે યુવક બસના ટાયર નીચે આવી જતાં તેને ગંભીર ઈજાઓ પહોંચી હતી અને તેનું ઘટનાસ્થળે જ પ્રાણપંખેરું ઊડી ગયું હતું.
અકસ્માતની જાણ થતાં જ આસપાસના લોકો તાત્કાલિક સ્થળ પર દોડી આવ્યા હતા અને ઘટના અંગે મકરપુરા પોલીસને જાણ કરી હતી. બનાવની માહિતી મળતા જ પોલીસ કાફલો ઘટનાસ્થળે પહોંચી ગયો હતો. પોલીસે યુવકના મૃતદેહને કબજે કરી પોસ્ટમોર્ટમ અર્થે સયાજી હોસ્પિટલ (SSG) ખાતે ખસેડવાની તજવીજ હાથ ધરી હતી.
આ અકસ્માતને પગલે સ્થાનિકોમાં એસ.ટી. બસના ચાલકોની બેદરકારી સામે ભારે રોષ જોવા મળ્યો હતો. પોલીસે બસ ચાલક વિરુદ્ધ અકસ્માતનો ગુનો નોંધી આગળની કાયદેસરની કાર્યવાહી હાથ ધરી છે.
(1:27 PM IST)
છેલ્લા 8 દિવસમાં સૌથી લોકપ્રિય 
