સુરત જિલ્લાના કામરેજ તાલુકામાં આજે સવારે એક ગંભીર અકસ્માતની ઘટના સામે આવી છે, જેમાં દર્દીને લઈને હોસ્પિટલ તરફ જઈ રહેલી108 એમ્બ્યુલન્સ બેકાબુ બનીને પતરાના શેડમાં ઘૂસી ગઈ હતી. સદનસીબે આ અકસ્માતમાં કોઈ મોટી જાનહાનિ થઈ નથી, જેના પગલે તંત્ર અને પરિવારજનોએ હાશકારો અનુભવ્યો છે.

મળતી માહિતી મુજબ, 108 એમ્બ્યુલન્સ એક દર્દીને તાત્કાલિક સારવાર માટે હોસ્પિટલ લઈ જઈ રહી હતી. આ દરમિયાન કામરેજના વલણ ગામ નજીક પહોંચતા જ એમ્બ્યુલન્સના ચાલકે અચાનક સ્ટેયરિંગ પરથી કાબૂ ગુમાવી દીધો હતો. બેકાબુ બનેલી એમ્બ્યુલન્સ સીધી જ રસ્તા પર આવેલા એક પતરાના શેડમાં ઘૂસી ગઈ હતી. આ દ્રશ્ય જોઈને એમ્બ્યુલન્સમાં સવાર દર્દી અને તેમના પરિવારજનોના જીવ તાળવે ચોંટ્યા હતા.

અકસ્માત સર્જાયા બાદ એમ્બ્યુલન્સમાં હાજર સ્ટાફે સમયસૂચકતા વાપરીને દર્દીને હેમખેમ એમ્બ્યુલન્સમાંથી બહાર કાઢ્યા હતા. આ ઘટનાના સીસીટીવી ફૂટેજ પણ સામે આવ્યા છે, જેમાં એમ્બ્યુલન્સ શેડ સાથે અથડાતી જોઈ શકાય છે. કોઈ મોટી દુર્ઘટના ટળી જતાં આસપાસના લોકો અને પરિવારજનોએ રાહતનો શ્વાસ લીધો હતો. હાલ આ મામલે આગળની તપાસ હાથ ધરવામાં આવી છે.