વડોદરા, તા.૧૧: દિવાળીના પાવન પર્વ અને મિની વેકેશનની રજાઓ માણવા માટે વડોદરા મહાનગરપાલિકા સંચાલિત ઐતિહાસિક સયાજીબાગ (કમાટીબાગ) ખાતે સ્થાનિકો અને રાજ્યભરમાંથી આવેલા પ્રવાસીઓનો ભારે ધસારો જોવા મળ્યો છે.

પ્રાપ્ત વિગતો અનુસાર, તહેવારોના આ દિવસોમાં કમાટીબાગ ખાતે સામાન્ય દિવસોની સરખામણીમાં ચાર ગણી વધુ જનમેદની ઉમટી પડી હતી, જેના કારણે બાગના તમામ મુખ્ય આકર્ષણો અને પરિસર પર લોકોની ભારે ભીડ જામી હતી.

આ બાગ તેના હરિયાળા વાતાવરણની સાથે જોય ટ્રેનની સવારી, ઐતિહાસિક મ્યુઝિયમ, પક્ષીઘર, વિશાળ એક્વેરિયમ અને પ્રેરણાદાયી સંકલ્પ ભૂમિ જેવા આકર્ષણો દ્વારા દરેક ઉંમરના લોકો માટે આકર્ષક કેન્દ્ર બન્યો છે.

આજના મોંઘવારીના યુગમાં અત્યંત વ્યાજબી અને ઓછા ખર્ચે મધ્યમ વર્ગના પરિવારોને ભરપૂર મનોરંજન પૂરું પાડતું આ સ્થળ સમગ્ર ઉત્સવ દરમિયાન પારિવારિક મેળાવડાનું મુખ્ય કેન્દ્ર સાબિત થયું છે.

પ્રવાસીઓની આ અસાધારણ ભીડને ધ્યાનમાં રાખીને વડોદરા મહાનગરપાલિકા તંત્ર દ્વારા બાગના પરિસરમાં સ્વચ્છતા, સુરક્ષા અને નાગરિક સુવિધાઓ માટે વિશેષ અને સઘન વ્યવસ્થાઓ ગોઠવવામાં આવી છે.

આગામી દિવસોમાં પણ વેકેશનના અંત સુધી પ્રવાસીઓનો આ પ્રવાહ સતત જળવાઈ રહેવાની સંભાવના છે, જેના કારણે સ્થાનિક વેપારીઓ અને પ્રવાસન ક્ષેત્રમાં પણ ઉત્સાહનો માહોલ જોવા મળી રહ્યો છે.