અમદાવાદ :શહેરના પૂર્વ વિસ્તારમાં આવેલા નિકોલમાં ચોંકાવનારી ચોરીની ઘટના સામે આવી છે. નિકોલના જાણીતા 'આભૂષણ જ્વેલર્સ' માંથી અંદાજે દોઢ કરોડ રૂપિયાની કિંમતના સોનાના દાગીનાની ચોરી થતા સમગ્ર વેપારી આલમમાં ખળભળાટ મચી ગયો છે. સૌથી આઘાતજનક વાત એ છે કે આ ચોરીમાં શોરૂમની જ એક વિશ્વાસુ મહિલા કર્મચારીની સંડોવણી હોવાની આશંકા વ્યક્ત કરવામાં આવી છે.

મળતી માહિતી મુજબ, આભૂષણ જ્વેલર્સના માલિકે શોરૂમમાં કામ કરતી હર્ષિદા નામની મહિલા કર્મચારી સામે પોલીસ ફરિયાદ નોંધાવી છે. જ્વેલર્સ ઓનરનો આક્ષેપ છે કે હર્ષિદાએ શોરૂમમાંથી લાંબા સમયથી થોડા-થોડા કરીને અંદાજે દોઢ કરોડની કિંમતના સોનાના દાગીનાની ચોરી કરી છે. સ્ટોકની ગણતરી દરમિયાન આટલી મોટી માત્રામાં સોનું ઓછું હોવાનું જણાઈ આવતા માલિકના પગ નીચેથી જમીન સરકી ગઈ હતી.

ઘટનાની જાણ થતા જ નિકોલ પોલીસ ઘટનાસ્થળે પહોંચી હતી અને શોરૂમના CCTV ફૂટેજ કબજે કર્યા છે. પોલીસ દ્વારા આક્ષેપ થયેલ મહિલા કર્મચારીની પૂછપરછ કરવાની તજવીજ હાથ ધરવામાં આવી છે. જ્વેલર્સના માલિકની માંગ છે કે આરોપીની તાત્કાલિક ધરપકડ કરવામાં આવે અને તેમના જીવનભરની કમાણી જેવા કિંમતી દાગીના વહેલી તકે પરત મળી રહે.

આ ઘટનાએ ફરી એકવાર સાબિત કર્યું છે કે કિંમતી વસ્તુઓના વ્યવસાયમાં માત્ર ટેકનોલોજી નહીં, પણ કર્મચારીઓની વિશ્વસનીયતા પણ એટલી જ મહત્વની છે. પોલીસ હાલ આ ચોરીમાં અન્ય કોઈની સંડોવણી છે કે કેમ તે દિશામાં પણ ઝીણવટભરી તપાસ ચલાવી રહી છે.