અમદાવાદ: અહીંના વટવા વિસ્તારમાં આવેલા સાંતેજ હોમ્સમાં એક યુવકની તેના જ રૂમ પાર્ટનરો દ્વારા ક્રૂરતાપૂર્વક હત્યા કરી દેવામાં આવી હોવાની હચમચાવી દેનારી ઘટના સામે આવી છે. જમવામાં કીડી નીકળવા જેવી સામાન્ય બાબતે થયેલી બોલાચાલીમાં ઉશ્કેરાયેલા રૂમ પાર્ટનરોએ યુવકને માથામાં ઘા મારી બેભાન કરી દીધો હતો અને ત્યારબાદ તેના મોઢામાં કપડું ઠૂસી, હાથ-પગ બાંધીને ફ્લેટને બહારથી તાળું મારી ફરાર થઈ ગયા હતા. વટવા પોલીસે ત્વરિત કાર્યવાહી કરીને એક સગીર સહિત ચાર આરોપીઓની ધરપકડ કરી કાયદેસરની કાર્યવાહી હાથ ધરી છે.

અમદાવાદ શહેરના વટવા વિસ્તારમાં આવેલા સાંતેજ હોમ્સમાં રૂમ રાખીને રહેતા યુવકો વચ્ચે થયેલો સામાન્ય વિવાદ ખૂની ખેલમાં પરિણમ્યો છે. પ્રાપ્ત સત્તાવાર વિગતો અનુસાર, વટવાના સાંતેજ હોમ્સના એક ફ્લેટમાંથી અતિશય દુર્ગંધ આવતી હોવાની સ્થાનિક રહીશોએ પોલીસને જાણ કરી હતી. જેના આધારે વટવા પોલીસે તાત્કાલિક ઘટનાસ્થળે પહોંચીને બહારથી બંધ ફ્લેટનો દરવાજો તોડી અંદર પ્રવેશ કર્યો હતો.

અંદરનું દ્રશ્ય જોઈને પોલીસ અધિકારીઓ પણ ચોંકી ઉઠ્યા હતા. ફ્લેટમાં એક યુવકનો અત્યંત સડેલી હાલતમાં મૃતદેહ મળી આવ્યો હતો. મૃતક યુવકના હાથ અને પગ દોરડાથી બાંધેલા હતા અને તેનું મોં કપડા વડે બંધ કરી દેવામાં આવ્યું હતું. પ્રાથમિક દ્રષ્ટિએ જ સ્પષ્ટ થઈ ગયું હતું કે બે થી ત્રણ દિવસ પહેલા યુવકની ઘાતકી હત્યા કરવામાં આવી છે.

વટવા પોલીસે આ મામલે સિવિલ હોસ્પિટલમાં પોસ્ટમોર્ટમ કરાવવાની સાથે એફએસએલ (ફોરેન્સિક સાયન્સ લેબોરેટરી)ની મદદ લઈને અને આસપાસના સીસીટીવી ફૂટેજ ચકાસીને તપાસનો ધમધમાટ શરૂ કર્યો હતો. પોલીસની સઘન તપાસમાં અને ઝડપાયેલા આરોપીઓની પૂછપરછમાં એવું ચોંકાવનારું કારણ સામે આવ્યું છે કે, મૃતક યુવક અને આરોપીઓ એક જ ફ્લેટમાં રૂમ પાર્ટનર તરીકે રહેતા હતા. બનાવના દિવસે જમતી વખતે મૃતક યુવકના જમવામાં કીડી નીકળતા તેણે આ અંગે અન્ય રૂમ પાર્ટનરોને ફરિયાદ કરી હતી. આ સામાન્ય બાબતમાં ઉગ્ર બોલાચાલી અને ઝઘડો થયો હતો.

ઝઘડાએ એટલું ઉગ્ર સ્વરૂપ ધારણ કર્યું કે ઉશ્કેરાયેલા રૂમ પાર્ટનરોએ યુવકના માથામાં ઘા મારી દીધો હતો. માથામાં ગંભીર ઈજા થવાથી યુવક ઢળી પડ્યો હતો અને બેભાન થઈ ગયો હતો. ત્યારબાદ આરોપીઓએ યુવક કોઈ બૂમાબૂમ ન કરી શકે તે માટે તેના મોઢામાં કપડું ઠૂસી દીધું હતું અને તેના હાથ-પગ બાંધી દીધા હતા. યુવકને આ જ હાલતમાં છોડી દઈને તમામ હત્યારાઓ ફ્લેટને બહારથી તાળું મારીને ફરાર થઈ ગયા હતા.

વટવા પોલીસે આ સનસનીખેજ હત્યા કેસમાં ગણતરીના દિવસોમાં જ મોટી સફળતા મેળવીને એક કિશોર (સગીર) સહિત કુલ ચાર આરોપીઓની ધરપકડ કરી લીધી છે. હાલમાં પોલીસ દ્વારા આ તમામની સઘન પૂછપરછ કરવામાં આવી રહી છે અને કાયદાકીય કાર્યવાહી આગળ ધપાવવામાં આવી રહી છે.