ગાંધીનગર : રાજકોટ-જેતપુર સિક્સ લેન હાઈવે પર કામ અધૂરું હોવા છતાં ટોલટેક્સ વસૂલાતો હોવાનો મુદ્દો શુક્રવારે વિધાનસભા ગૃહમાં ગાજ્યો હતો. પાટણના ધારાસભ્ય કિરીટ પટેલે શૂન્યકાળ દરમિયાન આ મુદ્દો ઉઠાવીને NHAI ની કામગીરી સામે ગંભીર સવાલો ઉઠાવ્યા હતા.

ધારાસભ્ય કિરીટ પટેલે ગૃહમાં જણાવ્યું કે, "રાજકોટથી જેતપુર વચ્ચે 67 કિલોમીટરના સિક્સ લેન હાઈવેનું કામ હજુ 60% જ પૂરું થયું છે. અનેક જગ્યાએ સર્વિસ રોડ નથી, અંડરપાસ અધૂરા છે, સ્ટ્રીટ લાઈટ લાગી નથી અને સાઈન બોર્ડ પણ અપૂરતા છે. આવી સ્થિતિમાં ગોંડલ પાસે ટોલ પ્લાઝા શરૂ કરીને કાર-જીપ પાસેથી 85 રૂપિયા અને મોટા વાહનો પાસેથી 300 થી 500 રૂપિયા સુધીનો ટોલ વસૂલવામાં આવી રહ્યો છે. આ પ્રજા સાથે અન્યાય અને લૂંટ છે."

તેમણે વધુમાં કહ્યું કે, અધૂરા કામને કારણે રોજ અકસ્માતો થાય છે અને ટ્રાફિક જામ સર્જાય છે. હજારો વાહનચાલકો ટોલ ભર્યા પછી પણ ખાડા-ખબડાવાળા રસ્તે મુસાફરી કરવા મજબૂર છે. ધારાસભ્યએ માંગ કરી કે, "જ્યાં સુધી 100% કામ પૂર્ણ ન થાય અને તમામ સુવિધાઓ ન મળે ત્યાં સુધી ટોલ વસૂલી તાત્કાલિક બંધ કરવી જોઈએ."

આ મુદ્દે માર્ગ અને મકાન મંત્રીએ ગૃહને ખાતરી આપી કે તેઓ NHAI પાસેથી રિપોર્ટ મંગાવીને યોગ્ય કાર્યવાહી કરશે. ઉલ્લેખનીય છે કે છેલ્લા 2 મહિનાથી સ્થાનિક લોકો અને વાહનચાલકો પણ ટોલ વસૂલીનો વિરોધ કરી રહ્યા છે.