જૂનાગઢ : જૂનાગઢ જિલ્લા વહીવટી તંત્ર, ગુજરાત વન વિભાગ તથા સ્થાનિક પ્રશાસન દ્વારા સંયુક્ત રીતે ગિરનારની ઐતિહાસિક લીલી પરિક્રમા આગામી ૨૦ નવેમ્બરથી ૨૪ નવેમ્બર ૨૦૨૬ દરમિયાન યોજાશે. આ આધ્યાત્મિક પરિક્રમા કાર્તિક સુદ અગિયારસ એટલે કે દેવદિવાળીના પાવન અવસરથી શરૂ થઈને કાર્તિક પૂનમ સુધી ચાલે છે. આ ભવ્ય આયોજનને સફળ બનાવવા માટે જિલ્લા વહીવટી તંત્ર દ્વારા જોરશોરથી તૈયારીઓ આરંભી દેવામાં આવી છે જેથી દેશ-વિદેશથી પધારતા લાખો ભક્તોને કોઈપણ પ્રકારની અગવડ ન પડે.

આ મહત્વપૂર્ણ આયોજનના ભાગરૂપે ગિરનાર તીર્થક્ષેત્રના પૂજ્ય સંતો-મહાત્માઓ જેમાં ઇન્દ્રભારતી બાપુ, મહેશગિરિ બાપુ, મહેન્દ્રાનંદગિરિ બાપુ, મહાદેવગિરિ બાપુ અને કિશનદાસ બાપુ સહિતના સંતોએ પ્રશાસનિક અધિકારીઓ સાથે મળીને પરિક્રમા માર્ગનું સંયુક્ત નિરીક્ષણ કર્યું હતું. આ અવસરે સાંસદ રાજેશ ચુડાસમા, મેયર ધર્મેશ પોશીયા, ધારાસભ્ય સંજય કોરડીયા, જિલ્લા કલેક્ટર યોગેશ ચૌધરી, મનપા કમિશનર આઈ.આર. વાળા, જિલ્લા પોલીસ અધિક્ષક સુબોધ ઓડેદરા અને નાયબ વન સંરક્ષક અક્ષય જોશી સહિતના અગ્રણીઓ ઉપસ્થિત રહ્યા હતા. તમામ મહાનુભાવોએ સ્થળ પર જઈને લાખો શ્રદ્ધાળુઓ માટે પીવાનું પાણી, આરોગ્ય સેવાઓ, રોશની અને અન્ય જરૂરી સુવિધાઓ સુનિશ્ચિત કરવા અંગે વિસ્તૃત ચર્ચા-વિચારણા કરી હતી.

છત્રીસ કિલોમીટર લાંબો આ યાત્રા માર્ગ જૂનાગઢમાં ગિરનાર તળેટી ખાતે આવેલા ભવનાથ મહાદેવ મંદિરથી ૨૦ નવેમ્બરની મધ્યરાત્રિએ શરૂ થશે. આ યાત્રા ભવનાથ તળેટીથી પ્રારંભ થઈ ઝીણા બાબાની મઢી, મરવેલા અને બોરદેવી થઈને ૩૬ કિલોમીટરનું અંતર કાપીને પરત પ્રારંભિક સ્થળે જ પૂર્ણ થશે. માર્ગની દુર્ગમતા અને કઠિનતાને ધ્યાનમાં રાખીને સંતો અને લોકપ્રતિનિધિઓ દ્વારા અશક્ત, વયોવૃદ્ધ અને નાના બાળકોને બને ત્યાં સુધી આ પરિક્રમા નહીં કરવાની નમ્ર અપીલ કરવામાં આવી છે.

પર્યાવરણની રક્ષા અને પાણીની પૂરતી વ્યવસ્થા વિશે વાત કરતા જિલ્લા કલેક્ટર યોગેશ ચૌધરીએ જણાવ્યું હતું કે ચાલુ વર્ષે વરસાદની ઘટને કારણે કુદરતી જળસ્રોતોમાં પાણીની ઉપલબ્ધતા ઓછી છે, જેથી પીવાના પાણીની પર્યાપ્ત વ્યવસ્થા જાળવી રાખવા માટે બોરવેલના માધ્યમથી પાણીની સુવિધા વધારવા પર વિશેષ ભાર મૂકવામાં આવી રહ્યો છે. તેમણે પરિક્રમામાં પધારનાર વિશાળ જનમેદનીને વિશેષ અનુરોધ કર્યો છે કે તેઓ આ પરિક્રમાને સંપૂર્ણપણે પ્લાસ્ટિક મુક્ત બનાવે. યાત્રા દરમિયાન સિંગલ યુઝ પ્લાસ્ટિક, પ્લાસ્ટિકની થેલીઓ, કપ અને બોટલોનો ઉપયોગ ટાળવો તેમજ પાણી માટે પુનઃ ઉપયોગ કરી શકાય તેવી બોટલ સાથે રાખવી. શ્રદ્ધાળુઓને પર્યાવરણ અનુકૂળ બેગ પણ વિતરીત કરવામાં આવશે.

સુરક્ષા અને તબીબી વ્યવસ્થાઓ બાબતે વહીવટી તંત્ર દ્વારા કડક આગોતરા પગલાં લેવામાં આવ્યા છે. કલેક્ટરશ્રીએ વન વિભાગ સાથે સંકલન સાધીને પરિક્રમા માર્ગની મરામત, ટ્રાફિક નિયંત્રણ, પાર્કિંગ, વાહનવ્યવહાર, પેયજલ અને આરોગ્ય સુવિધાઓ સહિતની તમામ આવશ્યક વ્યવસ્થાઓ સમયસર પૂર્ણ કરવા સંબંધિત અધિકારીઓને તાકીદ કરી છે. શ્રદ્ધાળુઓની સેવામાં આવતા અન્નક્ષેત્રો અને સ્વૈચ્છિક સંસ્થાઓને પાણી સહિતની તમામ સુવિધાઓ મળી રહે તે સુનિશ્ચિત કરાયું છે. માર્ગ પર અસ્થાયી હોસ્પિટલો શરૂ કરાશે, એમ્બ્યુલન્સ તૈનાત રહેશે અને મેડિકલ તેમજ પેરામેડિકલ સ્ટાફ દિવસ-રાત પોતાની સેવાઓ આપશે. આ ઉપરાંત એસડીઆરએફની ટીમ પણ તૈનાત રહેશે અને પૂરતા પ્રમાણમાં દવાઓ તથા મેડિકલ કિટ ઉપલબ્ધ કરાવાશે. જિલ્લા પોલીસ અધિક્ષક સુબોધ ઓડેદરાએ સુરક્ષા વ્યવસ્થા વિશે જણાવ્યું હતું કે શ્રદ્ધાળુઓની સુરક્ષાાર્થે પાર્કિંગ સ્થળો અને અન્ય મુખ્ય જગ્યાઓ પર સીસીટીવી કેમેરા ગોઠવવામાં આવશે તેમજ અન્નક્ષેત્રો અને ઉતારા મંડળો માટે ખાસ વાહન પાસ ઇશ્યુ કરવામાં આવશે.