ગાંધીનગર મહાનગરપાલિકા દ્વારા શહેરની વસ્તી ગણતરી અને ઘરયાદી તૈયાર કરવાની પ્રક્રિયા માટેની તમામ તૈયારીઓ પૂર્ણ કરી લેવામાં આવી છે. આગામી 1 જૂનથી 30 જૂન સુધીના એક મહિનાના ગાળામાં સમગ્ર ગણતરી પ્રક્રિયા હાથ ધરવામાં આવશે. આ મહત્વની કામગીરીને પહોંચી વળવા માટે મનપા દ્વારા 925 ગણતરીદારો અને 144 સુપરવાઈઝરો મળીને કુલ 1069 કર્મચારીઓની નિમણૂક કરવામાં આવી છે. ગણતરીની પ્રક્રિયામાં કોઈ ક્ષતિ ન રહે તે હેતુથી, નિમણૂક કરાયેલા તમામ કર્મચારીઓને 11 મે થી 25 મે દરમિયાન વિશેષ તાલીમ આપવામાં આવશે. આ ઝુંબેશ અંતર્ગત દરેક ઘરની વિગતો અને વસ્તીના આંકડા એકત્રિત કરવામાં આવશે, જેના આધારે આગામી સમયમાં શહેરના આયોજન અને વિકાસની રૂપરેખા તૈયાર થશે. મનપા દ્વારા નાગરિકોને પણ આ પ્રક્રિયામાં ગણતરીદારોને સાચો ડેટા આપી સહયોગ કરવાની અપીલ કરવામાં આવી છે.