ગાંધીનગર મહાનગરપાલિકા (GMC) દ્વારા શહેરમાં ટ્રાફિકની સમસ્યા હળવી કરવા અને માર્ગોને અવરજવર માટે સુરક્ષિત બનાવવાના હેતુથી દબાણ હટાવો ઝુંબેશ સઘન બનાવવામાં આવી છે. આ કાર્યવાહી અંતર્ગત એસ્ટેટ વિભાગની ટીમે સરગાસણ, કુડાસણ અને રિલાયન્સ ચોકડી જેવા વ્યસ્ત વિસ્તારોમાં સપાટો બોલાવ્યો હતો. ડ્રાઈવ દરમિયાન રસ્તા પર નડતરરૂપ લારી-ગલ્લાઓ તેમજ ખાણીપીણીની અનધિકૃત લારીઓ દૂર કરવામાં આવી હતી, સાથે જ જાહેર માર્ગો પર આડેધડ પાર્ક કરવામાં આવેલા વાહનો સામે પણ કડક કાર્યવાહી હાથ ધરવામાં આવી હતી. GMC ની આ કામગીરીથી મુખ્ય માર્ગો ખુલ્લા થતાં ટ્રાફિકની સમસ્યામાં રાહત મળી છે અને સ્થાનિક રહીશો તેમજ વાહનચાલકોની અવરજવરમાં સરળતા રહેશે.