સુરત : સુરતના પાંડેસરા વિસ્તારમાંથી એક દુઃખદ ઘટના સામે આવી છે. પતિ દુકાનેથી ઘરે પરત ફર્યો ત્યારે તેની પત્ની ફાંસો ખાધેલી હાલતમાં મળી આવી હતી. પ્રાથમિક માહિતી મુજબ જમવાના મુદ્દે પતિ-પત્ની વચ્ચે ઝઘડો થયો હતો. 

મળતી વિગતો અનુસાર પાંડેસરા વિસ્તારમાં રહેતા યુવક અને તેની પત્ની વચ્ચે સવારે જમવાને લઈને બોલાચાલી થઈ હતી. ઝઘડા બાદ પતિ કામ અર્થે દુકાને ગયો હતો. બપોર બાદ જ્યારે પતિ ઘરે પરત ફર્યો ત્યારે ઘરનો દરવાજો અંદરથી બંધ હતો. ઘણી બૂમો પાડવા છતાં દરવાજો ન ખૂલતા પતિએ બારીમાંથી અંદર જોયું તો પત્ની પંખા સાથે દુપટ્ટો બાંધીને લટકતી હાલતમાં હતી.

પતિએ તાત્કાલિક બૂમાબૂમ કરતા આસપાસના લોકો ભેગા થઈ ગયા હતા અને દરવાજો તોડી અંદર પ્રવેશ કર્યો હતો. પત્નીને તાત્કાલિક નીચે ઉતારી સારવાર માટે હોસ્પિટલ ખસેડવામાં આવી હતી, પરંતુ ફરજ પરના તબીબે તેને મૃત જાહેર કરી હતી.

ઘટનાની જાણ થતાં પાંડેસરા પોલીસ ઘટનાસ્થળે પહોંચી હતી. પોલીસે મૃતદેહનો કબજો લઈ પોસ્ટમોર્ટમ માટે મોકલી આપ્યો છે. હાલ પોલીસે અકસ્માત મોતનો ગુનો નોંધી વધુ તપાસ શરૂ કરી છે. પરિવારજનોના નિવેદન લેવાની કાર્યવાહી ચાલુ છે. જમવાના સામાન્ય ઝઘડાએ ગંભીર સ્વરૂપ ધારણ કરતા પરિવારમાં શોકનું મોજું ફરી વળ્યું છે.

પોલીસે જણાવ્યું કે પ્રાથમિક તપાસમાં આપઘાતનું કારણ ઘરકંકાસ હોવાનું જણાય છે. જોકે પોસ્ટમોર્ટમ રિપોર્ટ અને પરિવારજનોના નિવેદન બાદ વધુ વિગતો બહાર આવશે.