સુરત : ઓનલાઈન ખરીદી-વેચાણની વ્યવસ્થાનો ગેરલાભ ઉઠાવી જાણીતી ઈ-કોમર્સ કંપની ફ્લિપકાર્ટ સાથે રૂ. ૪૨ લાખથી વધુની છેતરપિંડી કરવાના આંતરરાજ્ય સાયબર રેકેટનો સુરત સાયબર ક્રાઇમ પોલીસે પર્દાફાશ કર્યો છે. કંપનીની ફરિયાદ બાદ હાથ ધરાયેલી તપાસમાં માત્ર નવ દિવસમાં એક જ ઉપકરણ અને એક જ ઈન્ટરનેટ સરનામેથી આશરે ૫,૧૨૧ બોગસ ઓર્ડર કરવામાં આવ્યા હોવાનું સામે આવ્યું છે.

પોલીસ તપાસ પ્રમાણે આરોપીઓએ ફ્લિપકાર્ટની ‘સેલર પ્રોટેક્શન ફંડ’ નીતિનો ગેરલાભ લીધો હતો. બોગસ ઓર્ડરમાં ‘કેશ ઓન ડિલિવરી’નો વિકલ્પ પસંદ કરવામાં આવતો. ઓર્ડર મૂક્યા બાદ વેચનાર તરીકે કંપની પાસેથી ત્રણ દિવસમાં ચુકવણી મેળવી લેવામાં આવતી અને ચોથા દિવસે ઓર્ડર રદ કરી દેવામાં આવતો હોવાનો આરોપ છે. આ પદ્ધતિ વારંવાર અપનાવી કંપનીને રૂ. ૪૨ લાખથી વધુનું નુકસાન પહોંચાડવામાં આવ્યું હોવાનું તપાસમાં બહાર આવ્યું છે.

તપાસમાં આશરફ અને તેના સાથી રક્ષિતની મુખ્ય ભૂમિકા સામે આવી છે. બંને ટેલિગ્રામ મારફત ઝારખંડના જામતારા સાયબર નેટવર્ક સાથે સંપર્કમાં હોવાનું અને તેમની મદદથી નકલી વેચનાર ઓળખ તથા બોગસ ઓર્ડરનું નેટવર્ક ચલાવવામાં આવતું હોવાનું પોલીસ તપાસમાં સામે આવ્યું છે.

ચોંકાવનારી બાબત એ છે કે રક્ષિતના બેન્ક ખાતામાં છેલ્લા દસ મહિનામાં આશરે રૂ. ૨.૪૬ કરોડના શંકાસ્પદ નાણાકીય વ્યવહારો મળી આવ્યા છે. તપાસકર્તાઓને બોગસ ખાતાં બનાવવા માટે ઉપયોગમાં લેવાયેલી આશરે ૨૫ નકલી ઈ-મેઇલ ઓળખ પણ મળી છે. પોલીસે આશરફ, રક્ષિત સહિત આંતરરાજ્ય ગેંગના અન્ય શખ્સો સામે ગુનો નોંધી આ જ પદ્ધતિથી દેશની અન્ય કંપનીઓને પણ નિશાન બનાવાઈ છે કે કેમ તેની તપાસ આગળ ધપાવી છે.