તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Tuesday, 17th November 2026
પાટણમાં કાયદો-વ્યવસ્થાને ખુલ્લો પડકાર : ધમધમતા શ્રેય મોલ વિસ્તારમાં બુકાનીધારી શખસોનો ૫ થી ૬ રાઉન્ડ ગોળીબાર
ફાયરિંગના ધડાકાથી વેપારીઓ અને રાહદારીઓમાં જીવ બચાવવા નાસભાગ : હુમલાખોરો ફરાર થતા પોલીસે સમગ્ર જિલ્લામાં નાકાબંધી કરી એફએસએલ અને સીસીટીવી ફૂટેજના આધારે તપાસનો ધમધમાટ શરૂ કર્યો

પાટણ: શહેરના અત્યંત વ્યસ્ત અને સતત લોકોની અવરજવરથી ધમધમતા શ્રેય મોલ નજીક ધોળા દિવસે અજાણ્યા બુકાનીધારી હુમલાખોરોએ અંધાધૂંધ ફાયરિંગ કરીને પોલીસ તંત્રને ખુલ્લો પડકાર ફેંક્યો છે. ભરબપોરે ઉપરાછાપરી ૫ થી ૬ રાઉન્ડ ગોળીબાર થતા સમગ્ર વિસ્તારમાં ભારે ખળભળાટ અને ભયનો માહોલ ફેલાઈ ગયો હતો.
ગોળીબારના અવાજથી ભરચક વિસ્તારમાં અફરાતફરી:
પ્રાપ્ત માહિતી મુજબ, શ્રેય મોલ વિસ્તારમાં રોજિંદા ક્રમ મુજબ લોકો અને વાહનોની અવરજવર ચાલી રહી હતી ત્યારે મોઢે બુકાની બાંધીને આવેલા શખસોએ અચાનક હથિયાર કાઢીને ઉપરાછાપરી પાંચથી છ રાઉન્ડ ફાયરિંગ કર્યું હતું. ગોળીબારના પ્રચંડ ધડાકા સાંભળતા જ આસપાસના દુકાનદારો, ખરીદી કરવા આવેલા ગ્રાહકો અને રાહદારીઓમાં ભારે ગભરાટ ફેલાયો હતો અને જીવ બચાવવા માટે લોકોમાં નાસભાગ મચી ગઈ હતી. આ સનસનાટીભરી ઘટનાને અંજામ આપ્યા બાદ હુમલાખોરો ગણતરીની પળોમાં જ ત્યાંથી પલાયન થઈ ગયા હતા.
ઘટનાસ્થળે પોલીસ કાફલો અને એફએસએલની તપાસ:
ફાયરિંગની જાણ થતા જ પાટણ પોલીસના ઉચ્ચ અધિકારીઓ સહિતનો મોટો કાફલો તાત્કાલિક ઘટનાસ્થળે પહોંચી ગયો હતો. પોલીસે સુરક્ષાના કારણોસર શ્રેય મોલ આસપાસના વિસ્તારને કોર્ડન કરીને ઘેરાબંધી કરી લીધી હતી. તપાસ દરમિયાન ઘટનાસ્થળેથી ફૂટેલા કારતૂસના ખોખા મળી આવ્યા હતા, જેને કબજે કરીને ફોરેન્સિક સાયન્સ લેબોરેટરી એટલે કે એફએસએલની મદદથી વૈજ્ઞાનિક તપાસ હાથ ધરવામાં આવી છે.
જિલ્લાભરમાં નાકાબંધી અને સીસીટીવી ફૂટેજની ચકાસણી:
હુમલાખોરોને ઝડપી પાડવા માટે પાટણ પોલીસે સમગ્ર શહેર અને જિલ્લાની તમામ સરહદો સીલ કરીને સઘન નાકાબંધી ગોઠવી દીધી છે. આ ઉપરાંત શ્રેય મોલ, આસપાસની દુકાનો અને મુખ્ય માર્ગો પર લાગેલા સીસીટીવી કેમેરાના ફૂટેજ મેળવીને આરોપીઓનું પગેરું મેળવવા માટે યુદ્ધના ધોરણે કામગીરી શરૂ કરાઈ છે. આ ગોળીબાર અંગત અદાવત, ખંડણી વસૂલવાના ઈરાદે કે અન્ય કોઈ કારણોસર કરાયો છે તે દિશામાં પોલીસે અલગ-અલગ ટીમો બનાવીને તપાસ તેજ કરી છે.
(12:16 PM IST)









છેલ્લા 8 દિવસમાં સૌથી લોકપ્રિય 
