પંચમહાલ જિલ્લા પ્રાથમિક શિક્ષણાધિકારીની કચેરીમાં થયેલા કરોડો રૂપિયાના સાધન ખરીદી કૌભાંડમાં સંડોવાયેલા મુખ્ય આરોપીઓને મોટો ફટકો પડ્યો છે. કરાર આધારિત કર્મચારીઓ દ્વારા આચરવામાં આવેલા ₹2.79 કરોડના કૌભાંડ મામલે આરોપીઓએ ધરપકડથી બચવા માટે એડિશનલ સેશન્સ કોર્ટમાં આગોતરા જામીન અરજી કરી હતી, જેને કોર્ટે નામંજૂર કરી દીધી છે. સમગ્ર મામલે જિલ્લા પ્રાથમિક શિક્ષણાધિકારી (DPEO) દ્વારા અગાઉ પોલીસ ફરિયાદ નોંધાવવામાં આવી હતી. કોર્ટના આ નિર્ણય બાદ હવે પોલીસ દ્વારા આરોપીઓની ધરપકડ માટેના ચક્રો ગતિમાન કરવામાં આવ્યા છે.