સુરત :સુરતના ઉડ્યન ક્ષેત્રમાં નવો સીમાચિહ્નરૂપ અધ્યાય ઉમેરાવા જઈ રહ્યો છે. સુરત ઈન્ટરનેશનલ એરપોર્ટ ના ઇતિહાસમાં સૌપ્રથમ વખત મોટા કોમર્શિયલ પેસેન્જર વિમાનોનું નિયમિત નાઇટ પાર્કિંગ શરૂ થવા જઈ રહ્યું છે. અગ્રણી એરલાઇન કંપની એર ઈન્ડિયા એક્સપ્રેસ દ્વારા આગામી નવેમ્બર 2026થી પોતાના વિશાળ વિમાનો સુરત એરપોર્ટ પર પાર્ક કરવાનો સત્તાવાર નિર્ણય લેવામાં આવ્યો છે. આ પગલાથી સુરતની સ્થાનિક અને આંતરરાષ્ટ્રીય એર કનેક્ટિવિટીને નવી ઊંચાઈ મળશે.

પ્રાપ્ત વિગતો અનુસાર, એર ઈન્ડિયા એક્સપ્રેસ દ્વારા સુરત એરપોર્ટ પર પોતાના કાફલાના અત્યાધુનિક એરબસ અને બોઈંગ શ્રેણીના મોટા વિમાનો પાર્ક કરવા માટેની વહીવટી અને ટેકનિકલ તૈયારીઓ પૂર્ણ કરી લેવામાં આવી છે. આ વ્યવસ્થા હેઠળ અઠવાડિયામાં નિર્ધારિત 3 દિવસ એટલે કે બુધવાર, શુક્રવાર અને રવિવારે આ વિમાન સુરત એરપોર્ટ પર રાત્રિ રોકાણ કરશે. એરપોર્ટ પ્રશાસન દ્વારા એરક્રાફ્ટ પાર્કિંગ બે અને સુરક્ષા સંબંધિત તમામ માપદંડોને મંજૂરી આપી દેવામાં આવી છે.

 આ સમગ્ર પાર્કિંગ શિડ્યુલ પાછળ એક સુવ્યવસ્થિત ઓપરેશનલ પ્લાન તૈયાર કરાયો છે. આંતરરાષ્ટ્રીય રૂટની શારજાહ-સુરત ફ્લાઇટ અને ડોમેસ્ટિક સેક્ટરની બેંગલુરુ-સુરત ફ્લાઇટના આગમન બાદ આ વિમાન સુરત ખાતે પાર્ક રહેશે. ત્યારબાદ બીજા દિવસે વહેલી સવારે આ જ વિમાન સુરતથી નિર્ધારિત રૂટ પર પોતાની મુસાફરી શરૂ કરશે. આ વ્યવસ્થાથી મુસાફરોને વહેલી સવારની ફ્લાઇટની સુવિધા મળશે, જે બિઝનેસ ટ્રાવેલર્સ માટે અત્યંત લાભદાયી સાબિત થશે.

એવિએશન ક્ષેત્રના નિષ્ણાતોના મતે, કોઈપણ એરપોર્ટ પર જ્યારે વિમાનોનું નાઇટ પાર્કિંગ શરૂ થાય છે ત્યારે તે એરપોર્ટની વિશ્વસનીયતા અને સંચાલન ક્ષમતામાં અનેકગણો વધારો થાય છે. રાત્રે વિમાન સુરતમાં રોકાણ કરતું હોવાથી આગામી દિવસોમાં સુરતથી દિલ્હી, મુંબઈ, ચેન્નાઈ, હૈદરાબાદ કે કોલકાતા જેવા દેશના અન્ય પ્રમુખ મેટ્રો શહેરો માટે નવી સીધી ફ્લાઇટ્સ શરૂ કરવાનો માર્ગ મોકળો બનશે. આ ઉપરાંત અન્ય એરલાઇન્સ કંપનીઓ પણ સુરતમાં પોતાના વિમાનો પાર્ક કરવા માટે આગળ આવી શકે છે.

સુરતના હીરા ઉદ્યોગકારો, ટેક્સટાઇલ વેપારીઓ અને દક્ષિણ ગુજરાતના મુસાફરો લાંબા સમયથી વધુ ફ્લાઇટ્સ અને રાઉન્ડ-ધ-ક્લોક ઓપરેશન્સની માંગ કરી રહ્યા હતા. વિમાનના પાર્કિંગથી ફ્લાઇટ કેન્સલેશનના દરમાં ઘટાડો થશે અને સમયપાલન જળવાઈ રહેશે. સુરતના આંગણે સર્જાયેલી આ ઐતિહાસિક સિદ્ધિથી સ્થાનિક પર્યટન, ઔદ્યોગિક વિકાસ અને એર કાર્ગો સુવિધાઓને પણ નોંધપાત્ર પ્રોત્સાહન પ્રાપ્ત થશે.

.