(જીતેન્‍દ્ર રૂપારેલિયા દ્વારા) વાપી, તા.૩૦: ગુજરાતની જીવાદોરી સમાન સરદાર સરોવર નર્મદા ડેમ લગભગ સંપૂર્ણ ભરાવાની સ્‍થિતિએ પહોંચી ગયો છે. બુધવારે સવાર સુધી ઉપલબ્‍ધ છેલ્લી ખાતરીપાત્ર વિગતો પ્રમાણે ડેમની જળસપાટી ૧૩૮.૬૭ મીટર નોંધાઈ હતી. મહત્તમ જળસપાટી ૧૩૮.૬૮ મીટર હોવાથી ડેમ સંપૂર્ણ ભરાવાથી માત્ર એક સેન્‍ટિમીટર દૂર રહ્યો છે.

ડેમમાં આશરે ૯૯.૯૦ ટકા પાણીનો સંગ્રહ થયો છે અને ઉપયોગી જળસંગ્રહ ૫,૭૩૪.૨૪ મિલિયન ઘનમીટર નોંધાયો છે. ઉપરવાસમાંથી આશરે ૪૯,૭૧૮ કયુસેક પાણીની આવક ચાલુ હોવાથી જળસપાટી ઉપર તંત્ર દ્વારા સતત નજર રાખવામાં આવી રહી છે.

પાણીના વ્‍યવસ્‍થાપનની સાથે કેનાલ હેડ વીજમથકનાં ત્રણ ટર્બાઇન દ્વારા વીજ ઉત્‍પાદન ચાલુ હોવાની વિગતો મળી છે. અગાઉના અહેવાલ મુજબ રિવર બેડ વીજમથકનાં ટર્બાઇન બંધ રાખવામાં આવ્‍યાં હતાં. પાણીની આવક અને જાવક પ્રમાણે વીજ ઉત્‍પાદન તથા કેનાલમાં પાણી છોડવાની વ્‍યવસ્‍થા કરવામાં આવી રહી છે.

સપ્‍ટેમ્‍બરના છેલ્લા દિવસોમાં ઉપરવાસમાંથી પાણીની આવક વધતાં ડેમની સપાટીમાં સતત વધારો થયો હતો. ગત ૨૩ સપ્‍ટેમ્‍બરે સપાટી ૧૩૮.૪૮ મીટર હતી, જે હવે ૧૩૮.૬૭ મીટરે પહોંચી છે. આ જળસંગ્રહ રાજ્‍યની આગામી પીવાના પાણીની જરૂરિયાત, શિયાળુ ખેતી અને સિંચાઈ વ્‍યવસ્‍થા માટે મોટી રાહતરૂપ બનશે.

દરમિયાન ડેમ મહત્તમ સપાટીની એકદમ નજીક પહોંચતાં આજે એકતાનગર ખાતે મુખ્‍યમંત્રી ભૂપેન્‍દ્ર પટેલના હસ્‍તે શાષાોક્‍ત વિધિથી મા નર્મદાના પવિત્ર નીરનું પૂજન અને વધામણાં કરવાની તૈયારીઓ કરવામાં આવી છે. ડેમ પૂર્ણ સપાટીએ પહોંચે ત્‍યારે જળપ્રવાહ અને સંભવિત જાવક અંગે તંત્રની સત્તાવાર સૂચનાઓનું પાલન કરવા પણ જણાવાયું છે.