અમદાવાદમાં યોજાનારી રથયાત્રાને પગલે પોલીસ દ્વારા સરહદી વિસ્તારોમાં હાથ ધરવામાં આવેલા સઘન ચેકિંગ દરમિયાન અરવલ્લીમાં મોટી સફળતા મળી છે, જેમાં અમદાવાદ-ઉદેપુર રાષ્ટ્રીય ધોરીમાર્ગ પરથી એક ઈસમને ગેરકાયદેસર હથિયારો સાથે ઝડપી પાડવામાં આવ્યો છે. મોડાસા પોલીસે શંકાસ્પદ ક્રેટા કારને અટકાવી તલાશી લેતા તેમાંથી ૧ પિસ્તોલ, ૨ મેગેઝિન અને ૨૪ જીવતા કારતૂસનો મોટો જથ્થો મળી આવ્યો હતો, જેને પગલે પોલીસે ઘટનાસ્થળેથી જ એક આરોપીની ધરપકડ કરી કાયદેસરની કાર્યવાહી હાથ ધરી છે. આ ગુનામાં સંડોવાયેલો અન્ય એક સાગરીત હાલ ફરાર થઈ જવામાં સફળ રહ્યો છે, જેને પકડવા માટે પોલીસે અલગ-અલગ ટીમો બનાવી તપાસના ચક્રો ગતિમાન કર્યા છે.