ગાંધીનગર-કલોલ હાઈવે નજીકના રહેણાંક વિસ્તારમાં પીવાના પાણીમાં ગટરના ગંદા પાણી ભળવાની ગંભીર ફરિયાદ ઉઠી છે, જેને પગલે સ્થાનિક રહીશોમાં ભારે આક્રોશ જોવા મળી રહ્યો છે. આ મામલે સ્થાનિકો દ્વારા નગરપાલિકાને લેખિત અને મૌખિક રજૂઆતો કરી દૂષિત પાણીની સમસ્યા અંગે તાકીદે ઉકેલ લાવવા જાણ કરવામાં આવી છે. બીજી તરફ, આરોગ્ય વિભાગ દ્વારા આ વિસ્તારમાંથી પીવાના પાણીના જે નમૂના (સેમ્પલ) લેવામાં આવ્યા હતા તે ટેસ્ટિંગમાં પણ ફેલ સાબિત થતાં લોકોની ચિંતા બમણી થઈ ગઈ છે. દૂષિત પાણીના કારણે ગમે ત્યારે કલોલ હાઈવેના આ સોસાયટી વિસ્તારોમાં પાણીજન્ય રોગચાળો ફાટી નીકળે તેવી દહેશત હોવાથી સ્થાનિકો દ્વારા તંત્ર પાસે તાત્કાલિક શુદ્ધ પીવાનું પાણી પૂરું પાડવા અને ગટર લાઇનનું સમારકામ કરવાની ઉગ્ર માંગ કરવામાં આવી રહી છે.