વડોદરાના જરોદ ગામના ડેરીવાળા ફળિયામાં છેલ્લા ત્રણ દિવસથી એક કપિરાજે ભારે આતંક મચાવ્યો છે. કપિરાજે અત્યાર સુધીમાં બે મહિલા અને બે પુરુષો સહિત કુલ 4 લોકોને બચકાં ભરીને ઇજાગ્રસ્ત કર્યા છે. વાંદરાના આ હિંસક હુમલાઓને પગલે સ્થાનિક રહીશોમાં ભારે ભયનો માહોલ છવાયો છે અને લોકો ઘરની બહાર નીકળતા પણ ડરી રહ્યા છે. આ ગંભીર સમસ્યાને પગલે વન વિભાગની ટીમ દોડતી થઈ છે અને કપિરાજને વહેલી તકે પાંજરે પૂરવા માટે ફળિયામાં પાંજરું ગોઠવીને આગળની કાર્યવાહી હાથ ધરી છે.