કડી: મહેસાણા જિલ્લાના કડીમાં લોકશાહીના પર્વમાં એક અનોખો ઈતિહાસ રચાયો છે. સ્થાનિક સ્વરાજ્યની ચૂંટણીની જાહેરાત તો થઈ છે, પણ કડી નગરપાલિકામાં રણમેદાન ખેલાય તે પહેલા જ ભારતીય જનતા પાર્ટીએ વિજયનો ડંકો વગાડી દીધો છે. ફોર્મ ભરવાના અંતિમ દિવસે જે દ્રશ્યો સામે આવ્યા તે જોઈને વિરોધ પક્ષો પણ સ્તબ્ધ થઈ ગયા છે. નગરપાલિકાની કુલ 36 બેઠકોમાંથી 22 બેઠકો પર ભાજપના ઉમેદવારો સામે કોઈ વિરોધી ન મળતા તેઓ બિનહરીફ (Unopposed) વિજેતા જાહેર થયા છે.
નીતિનભાઈ પટેલની ‘હોમ ગ્રાઉન્ડ’ પર માસ્ટરસ્ટ્રોક
કડીના રાજકારણના ચાણક્ય ગણાતા પૂર્વ નાયબ મુખ્યમંત્રી નીતિનભાઈ પટેલના માર્ગદર્શન હેઠળ ભાજપે એવી વ્યૂહરચના ગોઠવી કે વિપક્ષ મેદાનમાં ઉતરવાની હિંમત પણ ન કરી શક્યો. વોર્ડ નંબર 1, 3 અને 6 માં તો ભાજપની આખેઆખી પેનલ બિનહરીફ ચૂંટાઈ આવી છે. નીતિનભાઈ પટેલે આ ભવ્ય સફળતા અંગે હર્ષ વ્યક્ત કરતા જણાવ્યું હતું કે, આ જીત કડીની જનતાનો ભાજપ પરનો 40 વર્ષ જૂનો અતૂટ વિશ્વાસ દર્શાવે છે.
વિપક્ષના સૂપડા સાફ
કડીમાં છેલ્લા ચાર દાયકાથી ભાજપનો ગઢ અકબંધ રહ્યો છે. આ વખતે વિપક્ષી ઉમેદવારોએ કાં તો ફોર્મ ભર્યા જ નહીં અથવા તો અંતિમ સમયે મેદાન છોડી દીધું હતું. પરિણામે, ચૂંટણીના સત્તાવાર મતદાન પહેલા જ ભાજપે બહુમતીનો આંકડો (19 બેઠકો) વટાવીને 22 બેઠકો સાથે સત્તાના સિંહાસન પર કબ્જો જમાવી દીધો છે. આ ઘટનાક્રમે સાબિત કરી દીધું છે કે કડીમાં ભાજપનું સંગઠન કેટલું મજબૂત છે.
કાર્યકરોમાં દિવાળી જેવો માહોલ
ચૂંટણી પૂર્વે જ અડધાથી વધુ બેઠકો પર વિજય મળતા કડીમાં ભાજપના કાર્યકરોમાં ભારે ઉત્સાહ જોવા મળી રહ્યો છે. ફટાકડા ફોડી અને વિજય સરઘસ કાઢીને આ શાનદાર જીતની ઉજવણી કરવામાં આવી હતી. હવે બાકી રહેલી બેઠકો પર પણ ભાજપ ભવ્ય જીત મેળવશે તેવો આત્મવિશ્વાસ નીતિનભાઈ પટેલે વ્યક્ત કર્યો છે. કડીના આ કિસ્સાએ આખા મહેસાણા જિલ્લામાં ચર્ચા જગાવી છે કે શું આગામી દિવસોમાં અન્ય નગરપાલિકાઓમાં પણ આવો જ ચમત્કાર જોવા મળશે?