અશ્વિન વ્યાસ દ્વારા, ગાંધીનગર : માહિતી નિયામકની કચેરી, ગાંધીનગર ખાતે સંયુક્ત માહિતી નિયામક તરીકે નિષ્ઠાપૂર્વક સેવાઓ આપનાર જયેશભાઈ દવે વય નિવૃત્ત થતાં તેમનો ભાવભીનો વિદાયમાન સમારંભ યોજાયો હતો. આ પ્રસંગે ઉપસ્થિત તમામ અધિકારીઓ અને કર્મચારીઓએ તેમને ઉત્તમ સ્વાસ્થ્ય અને સુખી નિવૃત્ત જીવન માટે હૃદયપૂર્વકની શુભકામનાઓ પાઠવી હતી.

આ વિદાય સમારોહમાં મુખ્યમંત્રીના એપીઆરો વિવેક ત્રિવેદી વિશેષ ઉપસ્થિતિ રહ્યા હતા. આ ઉપરાંત નાયબ માહિતી નિયામક પારુલબેન મણિયાર, નિત્યા ત્રિવેદી, ચિંતન રાવલ, ડૉ. ઉર્વિ રાવલ, મનિષા વાઘેલા, સહાયક માહિતી નિયામક સંજયસિંહ ચાવડા અને અંકુર શ્રીમાળી સહિતના અધિકારીઓ-સહકર્મચારીઓએ જયેશભાઈ દવે સાથેના કાર્યકાળના મધુર અનુભવો શેર કર્યા હતા. આ ખાસ અવસરે જયેશભાઈ દવેના ધર્મપત્ની અને પુત્રી સહિતના પરિવારજનો પણ ઉપસ્થિત રહ્યા હતા.

પોતાના વિદાય પ્રવચનમાં સંયુક્ત માહિતી નિયામક જયેશભાઈ દવેએ માહિતી ખાતામાં જૂનાગઢ ખાતેથી માહિતી મદદનીશ વર્ગ-૩ તરીકે શરૂ થયેલી અને સંયુક્ત માહિતી નિયામક - સુપર ક્લાસ-૧ સુધી પહોંચેલી ૨૮ વર્ષની સરકારી સેવાના અનુભવો વાગોળ્યા હતા. તેમણે જણાવ્યું હતું કે સાથી કર્મયોગીઓના સાથ-સહકારથી જ તેઓ આ પદ સુધી પહોંચ્યા છે અને હંમેશા બધાને સાથે લઈને કામ કરવાની ભાવના રહી હોવાનું કહી તેમણે સહકર્મીઓનો આભાર વ્યક્ત કર્યો હતો.

જયેશભાઈ દવેની ૨૮ વર્ષીય પ્રેરણાદાયી કારકિર્દીની સફર:
 * સપ્ટેમ્બર ૧૯૯૮માં જૂનાગઢ ખાતે માહિતી મદદનીશ તરીકે સરકારી સેવાઓની શરૂઆત કરી હતી.
 * સિનિયર સબએડિટર તરીકે બઢતી મળ્યા બાદ ભરૂચ જિલ્લા માહિતી કચેરીમાં સેવા આપી હતી.
 * ગાંધીનગર વડી કચેરી ખાતે સમાચાર શાખામાં લાંબા સમય સુધી એટલે કે ૧૫ વર્ષ સુધી ફરજ બજાવી હતી.
 * લોકભવન ખાતે પ્રેસ સચિવ તરીકે સહાયક માહિતી નિયામકના હોદ્દા પર રહીને ચાર અલગ-અલગ રાજ્યપાલશ્રીઓ સાથે કામ કરવાનો ઉત્તમ અનુભવ મેળવ્યો હતો.
 * ગાંધીનગર જિલ્લા માહિતી કચેરીમાં નાયબ માહિતી નિયામક તરીકે ઉત્કૃષ્ટ કામગીરી કરી હતી.
 * કારકિર્દીના અંતિમ બે વર્ષ વડી કચેરીની પ્રકાશન શાખામાં લોકભોગ્ય વિવિધ પ્રકાશનો પ્રસિદ્ધ કરીને રાજ્ય સરકારની કામગીરીના પ્રચાર-પ્રસારમાં મોટો ફાળો નોંધાવ્યો હતો.