અમદાવાદમાં છેલ્લા બે દિવસથી ભારે ચર્ચામાં રહેલા આંતરધર્મિય લગ્નનો મામલો આખરે કાયદાકીય પ્રક્રિયા સાથે સંપન્ન થયો છે. મહેસાણાના યુવક અને અસારવાની યુવતીએ હાઈકોર્ટના કડક આદેશ બાદ આજે ખાસ જિલ્લા રજીસ્ટ્રાર સમક્ષ પોતાના લગ્ન નોંધાવ્યા છે. ગઈકાલે આ લગ્ન મુદ્દે VHP અને બજરંગ દળ દ્વારા ભારે વિરોધ અને હોબાળો કરવામાં આવ્યો હતો, જેને પગલે આજે ચુસ્ત પોલીસ બંદોબસ્ત હેઠળ જિલ્લા રજીસ્ટ્રાર એમ.એમ. સૈયદ સમક્ષ નોંધણી પ્રક્રિયા હાથ ધરવામાં આવી હતી.  

અત્રે ઉલ્લેખનીય છે કે, આ મામલો હાઈકોર્ટમાં હેબિયસ કોર્પસની અરજી બાદ ચર્ચામાં આવ્યો હતો. કોર્ટે યુવતીની સુરક્ષા અને તેની મરજીને પ્રાધાન્ય આપતા લગ્ન નોંધણીનો આદેશ કર્યો હતો. આ પ્રક્રિયા પૂર્ણ થયા બાદ હવે તેનો સત્તાવાર રિપોર્ટ હાઈકોર્ટમાં રજૂ કરવામાં આવશે.