અમદાવાદમાં નવરાત્રિના પવિત્ર તહેવાર દરમિયાન મહિલાઓની સુરક્ષા પર સવાલ ઉઠાવતી એક ગંભીર ઘટના સામે આવી છે. ઇસનપુર વિસ્તારના ભારતીય જનતા પાર્ટીના મહિલા કોર્પોરેટર અને તેમનો પરિવાર ગરબાના આયોજનમાં ભાગ લેવા માટે ઇસનપુરથી એસજી હાઈવે તરફ જઈ રહ્યો હતો. આ દરમિયાન, ફતેવાડી (જુહાપુરા પાસે) વિસ્તારમાં હોર્ન વગાડવા જેવી એક સામાન્ય બાબતે બાઈક ચાલક સાથે વિવાદ સર્જાયો હતો. આ સામાન્ય લાગતો વિવાદ થોડી જ વારમાં ઉગ્ર બની ગયો અને મામલો મારામારી સુધી પહોંચ્યો હતો.

પ્રાથમિક અહેવાલો મુજબ, બાઈક ચાલક અને તેના કેટલાક સાથીઓએ કોર્પોરેટરના વાહનને અટકાવીને હુમલો કરવાનો પ્રયાસ કર્યો હતો. કારમાં સવાર પરિવારે પોતાની સુરક્ષાને ધ્યાનમાં રાખીને બહાર નીકળવાનું ટાળ્યું હતું. આ સમયે, હુમલાખોરો દ્વારા કારના મિરર તોડવાનો પ્રયાસ કરવામાં આવ્યો હતો. આટલું જ નહીં, ઘટનાસ્થળે હાજર અન્ય કેટલાક અસામાજિક તત્વો દ્વારા મહિલા કોર્પોરેટર સાથે બિભત્સ ચેનચાળા અને અભદ્ર વર્તન પણ કરવામાં આવ્યું હોવાનો ગંભીર આરોપ છે. કેટલાક લોકોએ તો પેન્ટ ખોલીને અભદ્ર ઇશારા કર્યા હોવાની પણ માહિતી સામે આવી છે, જે અત્યંત શરમજનક અને અસ્વીકાર્ય ઘટના છે.

પરિસ્થિતિ વધુ વણસે અને કોઈ મોટી અનહોની થાય તે પહેલાં જ મહિલા કોર્પોરેટરના પુત્રએ તાત્કાલિક પોલીસ કંટ્રોલ રૂમ (112) પર જાણ કરી હતી. નવરાત્રિનો તહેવાર હોવાથી પોલીસ પણ ખૂબ જ એલર્ટ મોડમાં હતી, જેના પરિણામે ગણતરીના મિનિટોમાં જ પોલીસની ટીમ ઘટનાસ્થળે પહોંચી ગઈ હતી. પોલીસે સમયસર હસ્તક્ષેપ કરીને પરિસ્થિતિને કાબૂમાં લીધી અને વધુ હુમલો થતો અટકાવ્યો. આ મામલે પોલીસે તાત્કાલિક કાર્યવાહી કરીને શોએબ સમા સહિત ત્રણ આરોપીઓની ધરપકડ કરી છે.

આ ઘટનાએ રાજ્યમાં, ખાસ કરીને તહેવારોના દિવસોમાં જાહેર સ્થળોએ મહિલાઓની સુરક્ષા અને કાયદો-વ્યવસ્થાની સ્થિતિ અંગે ગંભીર સવાલો ઉભા કર્યા છે. જ્યારે એક ચૂંટાયેલા પ્રતિનિધિ, ભાજપના મહિલા કોર્પોરેટરને આવા કડવા અનુભવનો સામનો કરવો પડે, ત્યારે સામાન્ય નાગરિકો, ખાસ કરીને મહિલાઓની સુરક્ષાનું શું? આ એક ચિંતાજનક પ્રશ્ન છે