અમદાવાદ મ્યુનિસિપલ કોર્પોરેશનની નવી ટર્મમાં એક ઐતિહાસિક પરિવર્તન જોવા મળ્યું છે. આ વખતે મહાનગર પાલિકામાં પુરુષોની સરખામણીએ મહિલા કોર્પોરેટરોની સંખ્યામાં મોટો ઉછાળો આવ્યો છે. શહેરના વહીવટમાં હવે 50 ટકા થી પણ વધુ હિસ્સો મહિલાઓનો રહેશે. આ પરિણામોએ સાબિત કરી દીધું છે કે સ્થાનિક સ્વરાજ્યની સંસ્થાઓમાં મહિલા ઉમેદવારો પ્રત્યે જનતાનો વિશ્વાસ સતત વધી રહ્યો છે.

ચૂંટણીના આંકડાકીય વિશ્લેષણ મુજબ, અમદાવાદમાં પુરુષો કરતા વધુ મહિલા ઉમેદવારો વિજેતા બન્યા છે. મનપાની કુલ બેઠકોમાંથી 97 મહિલા ઉમેદવારોએ ભવ્ય વિજય મેળવ્યો છે. તેની સામે પુરુષ ઉમેદવારોની સંખ્યા 95 નોંધાઈ છે. આ જીત મહિલા સશક્તિકરણ ની દિશામાં એક મજબૂત ડગલું માનવામાં આવે છે. રાજકીય વિશ્લેષકો આ ફેરફારને શહેરના ભાવિ વિકાસ માટે ખૂબ જ મહત્વપૂર્ણ ગણાવી રહ્યા છે.

વિવિધ રાજકીય પક્ષોમાંથી પણ મહિલાઓએ નોંધપાત્ર દેખાવ કર્યો છે. ભારતીય જનતા પાર્ટીમાંથી સૌથી વધુ 80 મહિલા ઉમેદવારોએ જીત હાંસલ કરી છે. જ્યારે કોંગ્રેસ પક્ષમાંથી 17 મહિલા ઉમેદવારો મનપામાં પહોંચવામાં સફળ રહ્યા છે. આ આંકડા દર્શાવે છે કે સંગઠન અને પક્ષના માળખામાં પણ મહિલાઓને યોગ્ય પ્રતિનિધિત્વ મળી રહ્યું છે. હવે અમદાવાદના વિકાસના નિર્ણયોમાં મહિલાઓનો અવાજ વધુ બુલંદ બનશે.