તા. ૨૭ ઓગષ્ટ ર૦ર૬ વિક્રમ સંવત ર૦૮૨ શ્રાવણ સુદ – ૧૪ ગુરૂવાર
ગોધરામાં ૧૦૦ ટકા મુસ્લિમ વસ્તી ધરાવતા વોર્ડમાં હિન્દુ મહિલાની જીત
ધર્મ અને જ્ઞાતિના રાજકારણથી ઉપર ઉઠીને મુસ્લિમ મતદારોએ વિકાસ અને સ્થાનિક ભરોસાને પ્રાધાન્ય આપીને અપેક્ષાબેનને વિજેતા બનાવ્યા
ગોધરા તા.૨૯: ગુજરાત સ્થાનિક નિકાય ચૂંટણી ૨૦૨૬ માં ભાજપે ૧૫ મહાનગરપાલિકાઓ પર કબજો કર્યો છે, પરંતુ ગોધરાના વોર્ડ નંબર ૭ ના પરિણામોએ સૌનું ધ્યાન ખેંચ્યું છે. ૧૦૦ ટકા મુસ્લિમ મતદારો ધરાવતા આ વિસ્તારમાંથી અપક્ષ હિન્દુ મહિલા ઉમેદવાર અપેક્ષાબેન નૈનેશભાઈ સોનીએ ઐતિહાસિક જીત મેળવી છે. ધર્મ અને જ્ઞાતિના રાજકારણથી ઉપર ઉઠીને મુસ્લિમ મતદારોએ વિકાસ અને સ્થાનિક ભરોસાને પ્રાધાન્ય આપીને અપેક્ષાબેનને વિજેતા બનાવ્યા છે, જે સાંપ્રદાયિક ભાઈચારાનું અનોખું ઉદાહરણ પૂરું પાડે છે.
ગુજરાત સ્થાનિક સ્વરાજ્યની ચૂંટણીના જાહેર થયેલા સત્તાવાર આંકડાઓ મુજબ, ભાજપે કુલ ૯૯૦૦ થી વધુ બેઠકોમાંથી ૬૪૭૨ બેઠકો જીતીને વિજયનો પરચમ લહેરાવ્યો છે. કોંગ્રેસે ૧૪૧૨ બેઠકો હાંસલ કરી છે, જ્યારે આમ આદમી પાર્ટી, એઆઈએમઆઈએમ અને અપક્ષોના ફાળે ૫૯૭ બેઠકો આવી છે. અમદાવાદ, સુરત, રાજકોટ અને વડોદરા જેવા મોટા શહેરોમાં ભાજપે વિરોધ પક્ષોનો સફાયો કરી નાખ્યો છે. અમદાવાદમાં ભાજપે ૧૯૨ માંથી ૧૪૬ બેઠકો જીતી છે, જ્યારે સુરતમાં ૧૧૫ બેઠકો સાથે ભવ્ય વિજય મેળવ્યો છે. જોકે, આ આંકડાકીય માયાવી જાળ વચ્ચે ગોધરાના વોર્ડ નંબર ૭ માં મળેલી જીત લોકશાહીની સાચી સુંદરતા દર્શાવે છે.
ગોધરા નગરપાલિકાના ઈતિહાસમાં આ પ્રથમ વખત બન્યું છે કે જ્યારે કોઈ હિન્દુ મહિલા ઉમેદવાર એવા વિસ્તારમાંથી જીતી હોય જ્યાં એક પણ હિન્દુ મતદાર નથી. અપેક્ષાબેન નૈનેશભાઈ સોનીએ અપક્ષ ઉમેદવાર તરીકે વોર્ડ નંબર ૭ માંથી ચૂંટણી લડી હતી. આ વોર્ડની વિશેષતા એ છે કે અહીં ૧૦૦ ટકા મતદારો મુસ્લિમ સમુદાયના છે. નવાઈની વાત એ છે કે અપેક્ષાબેન પોતે આ વોર્ડના રજિસ્ટર્ડ મતદાર પણ નહોતા, તેમ છતાં તેમણે સ્થાનિક લોકોનો અતૂટ વિશ્વાસ જીતવામાં સફળતા મેળવી છે. આ જીત માત્ર એક રાજકીય વિજય નથી, પરંતુ ગોધરાની છબી બદલનારો એક મોટો સામાજિક બદલાવ છે.
રાજકીય વિશ્લેષકોના મતે, આ પરિણામ દર્શાવે છે કે મતદારો હવે પરંપરાગત ધાર્મિક કે જાતિ-આધારિત મતદાનની પદ્ધતિઓ છોડીને લાયકાત અને સ્થાનિક શાસન માટે યોગ્ય ઉમેદવારને પસંદ કરી રહ્યા છે. ગોધરાના મુસ્લિમ મતદારોએ અપેક્ષાબેનને આપેલા જંગી બહુમતીના જનાદેશે એ સાબિત કરી દીધું છે કે જ્યાં વિકાસ અને ભરોસો હોય ત્યાં સાંપ્રદાયિક ભેદભાવ ઓગળી જાય છે. આ વિજયને ગોધરાના રાજકીય ઈતિહાસમાં એક માઈલસ્ટોન માનવામાં આવે છે, જે સામાજિક એકતા અને સાંપ્રદાયિક ભાઈચારાના એક દુર્લભ ઉદાહરણ તરીકે ઉભરી આવ્યો છે.
આ ચૂંટણીના પરિણામો ભવિષ્યના ગુજરાતના રાજકારણ માટે પણ મોટા સંકેત આપી રહ્યા છે. ગ્રામીણ અને અર્ધ-શહેરી વિસ્તારોમાં મતદારો હવે પાયાની સુવિધાઓ અને યોગ્ય નેતૃત્વ પર વધુ ધ્યાન આપી રહ્યા છે. ભાજપે ભલે ૧૫ મહાનગરપાલિકાઓ પર પોતાનું નિયંત્રણ મેળવ્યું હોય, પરંતુ ગોધરા મોડલ એ તમામ રાજકીય પક્ષોને વિચારતા કરી દીધા છે. અમદાવાદમાં કોંગ્રેસ માત્ર ૧૮ બેઠકો પર સમેટાઈ ગઈ છે અને સુરતમાં આપ ને મોટો ફટકો પડ્યો છે ત્યારે ગોધરામાં મુસ્લિમ મતદારોએ હિન્દુ મહિલાને પસંદ કરીને એક નવો અધ્યાય શરૂ કર્યો છે. આ બદલાતા પવનની અસર આગામી ૨૦૨૭ ની વિધાનસભા ચૂંટણીમાં પણ જોવા મળી શકે છે
(10:46 AM IST)
છેલ્લા 8 દિવસમાં સૌથી લોકપ્રિય 
