સુરત : સુરતના અડાજણ વિસ્તારમાંથી એક અત્યંત હૃદયદ્રાવક અને કમકમાટીભરી ઘટના સામે આવી છે, જેણે કોઈ પણ માતા-પિતાનું કાળજું ધ્રુજાવી મૂકે. ઘરમાંથી બગીચામાં રમવા ગયેલો એક ૧૧ વર્ષનો માસૂમ બાળક રમતા રમતા મોતની ગર્તામાં ધકેલાઈ ગયો છે. બગીચાની નજીક વહેતી તાપી નદીના કિનારે પહોંચી ગયેલો આ બાળક અકસ્માતે ઊંડા પાણીમાં ગરકાવ થઈ ગયો હતો. સતત બે દિવસની દિલધડક સર્ચ ઓપરેશન અને શોધખોળ બાદ આખરે માસૂમનો મૃતદેહ મળી આવતા પરિવાર પર આભ તૂટી પડ્યું છે.
મળતી વિગતો અનુસાર, મૂળ નેપાળના વતની અને સુરતમાં સિક્યુરિટી ગાર્ડ તરીકે પ્રમાણિકતાથી નોકરી કરતા રામસિંગ સાઉદ પોતાના પરિવાર સાથે અડાજણ વિસ્તારમાં આવેલા SMC આવાસમાં રહે છે. પરિવારમાં બે દીકરા અને ત્રણ દીકરીઓ સાથે તેમનો સંસાર ખુશી-ખુશી ચાલી રહ્યો હતો. બે દિવસ પહેલાં તેમનો ૧૧ વર્ષનો વ્હાલસોયો પુત્ર શેરુ ઘરની નજીક આવેલા ગાર્ડનમાં અન્ય બાળકો સાથે રમવા માટે ગયો હતો. પરંતુ નિયતિને કંઈક જુદું જ મંજૂર હતું, રમતો રમતો શેરુ ગાર્ડનથી થોડે દૂર આવેલી તાપી નદીના કિનારે ક્યારે પહોંચી ગયો તેની કોઈને ખબર જ ન પડી.
બે દિવસની આશા નિરાશામાં બદલાઈ...
તાપી કિનારે કોઈ કારણોસર શેરુનો પગ લપસ્યો અથવા તે પાણીમાં કૂદ્યો અને જોતજોતામાં નદીના પ્રવાહમાં ડૂબી ગયો. બીજી તરફ શેરુ મોડે સુધી ઘરે પરત ન ફરતા પરિવારે તેની શોધખોળ આદરી હતી. બે દિવસ સુધી પિતા અને સગા-સંબંધીઓએ આસપાસના વિસ્તારો ફેંદી માર્યા હતા, પરંતુ શેરુનો કોઈ પતો લાગ્યો ન હતો.
આખરે ગત સાંજે આશરે ૬ વાગ્યાની આસપાસ તાપી નદીના કિનારે એક બાળકની લાશ તરતી હોવાની માહિતી મળતા જ પોલીસ અને પરિવાર ઘટનાસ્થળે દોડી ગયા હતા. નદીમાંથી બહાર કઢાયેલો મૃતદેહ ગુમ થયેલા શેરુનો જ હોવાનું સામે આવતા પિતા રામસિંગ સાઉદ અને પરિવાર સ્તબ્ધ થઈ ગયો હતો. પોતાના વ્હાલસોયા દીકરાના નિપ્રાણ દેહને જોઈને માતા-પિતાએ હૈયાફાટ રુદન કર્યું હતું, જેને પગલે સમગ્ર SMC આવાસમાં અને પંથકમાં ગમગીની વ્યાપી ગઈ છે. આ ઘટના આસપાસમાં રહેતા તમામ માતા-પિતા માટે એક લાલબત્તી સમાન છે કે નદી કે તળાવ જેવા જોખમી વિસ્તારોની નજીક રમતા બાળકો પર સતત નજર રાખવી કેટલી જરૂરી છે.