( અશ્વિન વ્યાસ દ્વારા : ગાંધીનગર :દિવાળી એટલે આનંદ, ઉત્સાહ અને પરિવાર સાથે ખુશીઓ વહેંચવાનો પર્વ. આ પર્વે દરેક વ્યક્તિ પોતાના પરિવારજનો સાથે દિવાળીની ઉજવણી કરી શકે અને સલામત રીતે પોતાના વતન સુધી પહોંચી શકે તેવા ઉમદા હેતુથી ગુજરાત રાજ્ય માર્ગ વાહન વ્યવહાર નિગમ (GSRTC), સુરત વિભાગ દ્વારા ‘દિવાળી એક્સ્ટ્રા બસ’ સેવાનું વિશેષ આયોજન કરવામાં આવ્યું છે.
   દિવાળીના તહેવારો દરમિયાન મુસાફરોની વધતી સંખ્યાને ધ્યાનમાં રાખીને સુરત વિભાગ દ્વારા 1,500થી વધુ વધારાની બસોનું આયોજન કરવામાં આવ્યું છે. સૌરાષ્ટ્ર, ઉત્તર ગુજરાત અને પંચમહાલ સહિતના વિવિધ વિસ્તારોમાં મુસાફરોને પોતાના વતન સુધી સુવિધાસભર અને સલામત મુસાફરી મળી રહે તે માટે આ વિશેષ બસ સેવા શરૂ કરવામાં આવી છે.
  આ વિશેષ બસ સેવાનો પ્રારંભ તા. 4 નવેમ્બર, 2026ના રોજ સાંજે 5:00 કલાકે થઈ ચૂક્યો છે. આ પ્રસંગે ગત રોજ તા. 7 નવેમ્બર, 2026ના રોજ આરોગ્ય મંત્રીશ્રી પ્રફુલ પાનશેરીયાએ સુરત એસ.ટી. બસ સ્ટેશનની મુલાકાત લઈ 'દિવાળી એક્સ્ટ્રા બસ' સેવાની વ્યવસ્થાનું નિરીક્ષણ કર્યું હતું.
મંત્રીએ બસમાં મુસાફરી કરી રહેલા મુસાફરો સાથે આત્મીયતાપૂર્વક વાતચીત કરી તેમની મુસાફરી, સુવિધાઓ અને વ્યવસ્થા અંગે જાણકારી મેળવી હતી. દિવાળીના પર્વે પોતાના વતન તરફ પ્રયાણ કરી રહેલા મુસાફરો સાથે સંવાદ સાધી મંત્રીએ તેમની મુસાફરી સુખદ અને સલામત રહે તેવી શુભેચ્છાઓ પાઠવી હતી.
આ પ્રસંગે મંત્રીએ વધુમાં વધુ મુસાફરોને 'દિવાળી એક્સ્ટ્રા બસ' સેવાનો લાભ લેવા અપીલ કરતાં જણાવ્યું હતું કે, તહેવારોના આ આનંદમય અવસરે મુસાફરોને તેમના પરિવારજનો સુધી સરળતાથી પહોંચાડવા માટે રાજ્ય સરકાર અને એસ.ટી. નિગમ દ્વારા વિશેષ વ્યવસ્થાઓ કરવામાં આવી છે. મુસાફરોની સુવિધા, સલામતી અને સમયસર પરિવહન માટે નિગમના કર્મચારીઓ અને અધિકારીઓ સતત કાર્યરત છે.
આ વિશેષ આયોજન માટે ગુજરાત રાજ્યના માનનીય મુખ્યમંત્રી ભૂપેન્દ્રભાઈ પટેલનો આભાર વ્યક્ત કરતાં મંત્રીએ જણાવ્યું હતું કે, રાજ્ય સરકારના માર્ગદર્શન અને સહયોગથી તહેવારોના સમયમાં નાગરિકોને સુવિધાસભર પરિવહન સેવા ઉપલબ્ધ કરાવવાના પ્રયાસો કરવામાં આવી રહ્યા છે. દિવાળીના પાવન પર્વે કોઈ પણ મુસાફરને પોતાના વતન પહોંચવામાં મુશ્કેલી ન પડે તે માટે સરકાર અને નિગમ દ્વારા સંવેદનશીલતાપૂર્વક આયોજન કરવામાં આવ્યું છે.
દિવાળી એક્સ્ટ્રા બસ સેવા તા. 4 નવેમ્બરથી 8 નવેમ્બર, 2026 સુધી.
દિવાળીના તહેવારો દરમિયાન મુસાફરોની સુવિધા માટે ગુજરાત રાજ્ય માર્ગ વાહન વ્યવહાર નિગમ, સુરત વિભાગ દ્વારા તા. 4 નવેમ્બરથી તા. 8 નવેમ્બર, 2026 સુધી આ વિશેષ બસ સેવા અમલમાં રહેશે.
આ આયોજન અંતર્ગત વિવિધ સ્થળોએથી બસોનું સંચાલન કરવામાં આવી રહ્યું છે, જેથી મુસાફરોને પોતાના વતન સુધી પહોંચવામાં સરળતા રહે.
દિવાળીના પર્વે પોતાના પરિવાર સાથે ખુશીઓ વહેંચવા જઈ રહેલા દરેક મુસાફરની મુસાફરી સુખદ, સલામત અને યાદગાર બને તે જ આ વિશેષ બસ સેવાનો મુખ્ય ઉદ્દેશ છે