(વિનોદ ગાલા દ્વારા)ભુજ  તા. 23 : દેશમાં કુલ મીઠાના ઉત્પાદનમાં 70 ટકા હિસ્સો ધરાવતા ગુજરાતને ડિઝલની અછતને કારણે મોટો ફટકો પડ્યો છે. મીઠાના ઉત્પાદન અને ટ્રાન્સપોર્ટેશન ઠપ થઈ જતા કચ્છના નાના રણ સહિત ધાંગધ્રા, ખારાઘોડા વિસ્તારના 3500થી વધુ અગરોની સ્થિતિ કફોડી બની છે. 

ગુજરાત કોંગ્રેસના પ્રવક્તા પાર્થિવરાજ કઠવાડીયાએ જણાવ્યું કે હાલ 60 લાખ ટન મીઠું પાકીને તૈયાર પડ્યું છે, પરંતુ ડિઝલ ઉપલબ્ધ ન થતાં તેને અગરમાંથી ઉપાડી શકાતું નથી. જો આ સ્થિતિમાં વરસાદ પડે તો 250 કરોડ રૂપિયાનું નુકસાન થવાની ભીતિ છે. 

કચ્છના નાના રણમાં 3500થી વધારે અગર આવેલા છે અને આશરે 50 હજાર લોકો સીધા મીઠાના ઉત્પાદન સાથે સંકળાયેલા છે. આડકતરી રીતે એક લાખ કરતાં વધારે લોકો આ વ્યવસાય સાથે જોડાયેલા છે. ડિઝલની અછતથી મીઠું પકવતા અગરિયાઓની આજીવિકાને માઠી અસર થઈ છે. 

ટ્રાન્સપોર્ટ એજન્સીઓ મીઠાને ટ્રાન્સફર કરવા માટે અગરિયા પાસે ડિઝલની માંગ કરી રહી છે. પરંતુ પંપ પર પૂરતી માત્રામાં ડિઝલ ન મળતાં પરિવહન વ્યવસ્થા ખોરવાઈ ગઈ છે. 

પાર્થિવરાજ કઠવાડીયાએ સરકારને વિનંતી કરી છે કે તાત્કાલિક અગરિયાઓને ડિઝલ ઉપલબ્ધ કરાવવામાં આવે. સાથે જ ડિઝલના પંપ પરથી કોણ વધારે ડિઝલ લઈ જઈ રહ્યું છે તેની તપાસ કરવાની માંગ પણ કરી છે. 

તેમણે કહ્યું કે ધાંગધ્રા, ખારાઘોડા અને કચ્છના નાના રણમાં અગરોની સ્થિતિ અત્યંત કફોડી છે. ડિઝલ ન મળવાના કારણે થયેલ નુકસાનનું સરકાર વળતર ચૂકવે તેવી માંગ પણ કોંગ્રેસ દ્વારા કરવામાં આવી છે.