અમદાવાદ : દેશભરમાં ન્યાયતંત્રમાં અદ્યતન ટેક્નોલોજીના ઉપયોગમાં સદાય અગ્રેસર રહેલી ગુજરાત હાઇકોર્ટે વધુ એક ઐતિહાસિક ડિજિટલ પહેલ હાથ ધરી છે. લાઈવ સ્ટ્રીમિંગ અને હાઇબ્રિડ હિયરિંગની સફળતા બાદ કોર્ટે પોતાના સંચાર માળખાને વધુ આધુનિક બનાવતા વકીલો માટે એક વિશેષ પાયલોટ યોજના શરૂ કરી છે. આ નવીન વ્યવસ્થા હેઠળ હવે નોંધાયેલા ધારાશાસ્ત્રીઓને તેમના કેસ સંબંધિત ડેઇલી કોઝ લિસ્ટ સીધું તેમના વોટ્સએપ પર જ મોકલવામાં આવશે, જેનાથી વકીલોને કોર્ટની સત્તાવાર વેબસાઇટ પર જઈને મેન્યુઅલ સર્ચ કરવાની જટિલતામાંથી કાયમી મુક્તિ મળશે.

હાઇકોર્ટ રજિસ્ટ્રી દ્વારા આ અંગે સત્તાવાર પરિપત્ર જારી કરીને વોટ્સએપ બિઝનેસ API પ્લેટફોર્મ મારફતે આ સેવા પાયલોટ પ્રોજેક્ટ તરીકે શરૂ કરવામાં આવી છે. અત્યાર સુધી વકીલોને મોબાઈલ પર માત્ર કોઝ લિસ્ટ અપલોડ થયાની પ્રાથમિક સૂચના જ મળતી હતી અને તેમણે પોતે પોર્ટલ પરથી સેંકડો પાનાની પીડીએફ ફાઇલોમાંથી કેસ નંબર કે નામ શોધવા પડતા હતા. નવી સિસ્ટમ જે-તે વકીલના લિસ્ટેડ કેસોને તારવીને પર્સનલાઈઝ્ડ કોઝ લિસ્ટ પીડીએફ સ્વરૂપે દરરોજ સાંજે તેમના વોટ્સએપ નંબર પર મોકલી આપશે, જેથી તેઓ એક જ ક્લિકમાં કોર્ટરૂમ અને સુનાવણીનો ક્રમ જાણી શકશે.

વેબસાઇટ પર સર્વર ડાઉન થવા કે ઇન્ટરનેટ કનેક્ટિવિટીના અભાવે થતો બિનજરૂરી સમયનો બગાડ અટકાવવામાં આ ટેકનોલોજી ખૂબ મદદરૂપ બનશે. ખાસ કરીને જૂનિયર વકીલો, બાર એસોસિએશનના સભ્યો અને દૂરના વિસ્તારોમાંથી હાઇકોર્ટમાં પ્રેક્ટિસ કરવા આવતા ધારાશાસ્ત્રીઓ મુસાફરી દરમિયાન પણ પોતાના કેસની સ્થિતિ તાત્કાલિક જાણી શકશે. કોર્ટ પ્રશાસને હાલ આ યોજનાને પ્રાયોગિક ધોરણે લાગુ કરી છે જેથી ટેકનીકલ ક્ષતિઓ સુધારી શકાય અને વપરાશકર્તા ધારાશાસ્ત્રીઓનો સીધો પ્રતિસાદ મેળવી શકાય.

ગુજરાત હાઇકોર્ટ દ્વારા ડિજિટલ ન્યાય પ્રણાલીને પ્રોત્સાહન આપવાના ભાગરૂપે શરૂ કરાયેલા આ પાયલોટ પ્રોજેક્ટના પરિણામો અને વકીલોના ફીડબેકના આધારે આગામી દિવસોમાં આ સેવાને આખરી ઓપ આપવામાં આવશે. જો આ પ્રયોગ સફળ રહેશે તો હાઇકોર્ટ પ્રશાસન પોતાની અન્ય તમામ મહત્વપૂર્ણ ઈ-સેવાઓ અને કેસ સ્ટેટસ અપડેટ્સને પણ વોટ્સએપ પ્લેટફોર્મ સાથે વ્યાપકપણે જોડવાનું આયોજન કરી રહ્યું છે.