​સિદ્ધપુર: ​અષાઢી બીજની રથયાત્રાના પવિત્ર અવસરને ધ્યાનમાં રાખીને સમગ્ર ગુજરાતમાં સુરક્ષા વ્યવસ્થા ચુસ્ત કરવામાં આવી છે, તેવા સમયે જ ગુજરાત એન્ટિ ટેરરિસ્ટ સ્કવોડ (ATS)ને મળેલી એક ચોક્કસ બાતમીના આધારે પાટણ જિલ્લાના સિદ્ધપુર ખાતે હાથ ધરાયેલું ઓપરેશન ભારે ચર્ચાનો વિષય બન્યું છે. સુરક્ષા એજન્સીઓએ સિદ્ધપુરના વ્યસ્ત ગણાતા ઝાંપલીપોળ વિસ્તારમાં સપાટો બોલાવીને શંકાસ્પદ આતંકવાદી ગતિવિધિમાં સંડોવાયેલા શખ્સોની અટકાયત કરતાં ખળભળાટ મચી ગયો છે.

​મળતી માહિતી મુજબ, રથયાત્રામાં વિઘ્ન નાખવાના કે કોઈ અનિચ્છનીય ઘટનાને અંજામ આપવાના ષડયંત્રના ભાગરૂપે આ તત્વો સક્રિય હોવાની આશંકા વ્યક્ત કરવામાં આવી રહી છે. એટીએસની ટીમે ઝાંપલીપોળ ખાતે આવેલી 'નૂરાની ટેલર્સ' નામની દુકાનને નિશાન બનાવી ત્યાં તપાસ હાથ ધરી હતી. સૂત્રોના જણાવ્યા અનુસાર, આતંકવાદી ગતિવિધિઓ માટે વપરાતી સામગ્રી, ખાસ કરીને નાના રમકડાંમાં વપરાતી બેટરીઓની શંકાસ્પદ ખરીદીના પગલે એટીએસ સતર્ક બની હતી. આ દુકાનમાંથી એક શખ્સની અટકાયત કરવામાં આવી છે અને તેને વધુ સઘન પૂછપરછ માટે અજ્ઞાત સ્થળે ખસેડવામાં આવ્યો છે.

​આ ઓપરેશન માત્ર એક વ્યક્તિ સુધી સીમિત ન રહેતા, સિદ્ધપુરમાંથી કુલ 5 શંકાસ્પદ વ્યક્તિઓની અટકાયત કરવામાં આવી છે. સ્થાનિક પોલીસને સાથે રાખીને ATSની ટુકડીઓએ દિવસભર વિવિધ વિસ્તારોમાં સર્ચ ઓપરેશન ચલાવ્યું હતું. અગાઉ રાજકોટમાંથી ઝડપાયેલા ત્રણ શંકાસ્પદ આતંકવાદીઓ બાદ, હવે સિદ્ધપુરમાં થયેલી આ કાર્યવાહીમાં કુલ 8 શંકાસ્પદ ઈસમો એજન્સીઓના સકંજામાં આવ્યા છે.

​ગુજરાત એટીએસ દ્વારા હાલમાં આ તમામ શખ્સોના કનેક્શન તપાસવામાં આવી રહ્યા છે, જેમાં પ્રતિબંધિત આતંકવાદી સંગઠન જૈશ-એ-મોહમ્મદ સાથેના જોડાણ અંગે પણ ઊંડાણપૂર્વક તપાસ શરૂ કરવામાં આવી છે. રાજ્યમાં શાંતિ ડહોળવાના આ મોટા ષડયંત્રને એટીએસ દ્વારા સમયસર પર્દાફાશ કરી લેવામાં આવ્યો હોવાનું પોલીસ સૂત્રો જણાવી રહ્યા છે. આગામી દિવસોમાં આ મામલે મોટા ઘટસ્ફોટ થવાની શક્યતાઓ પણ નકારી શકાય તેમ નથી. હાલ સિદ્ધપુર અને તેની આસપાસના વિસ્તારોમાં સુરક્ષા એજન્સીઓ દ્વારા સતત મોનિટરિંગ રાખવામાં આવી રહ્યું છે.