ભુજ :સમાનતા અને સામાજિક સમરસતાના મૂલ્યોને સાર્થક કરતા ગુજરાતના રાજ્યપાલ આચાર્ય દેવવ્રતજીએ કચ્છ જિલ્લાના ભોરારા ગામની મુલાકાત લઈને અનુસૂચિત જાતિ પરિવારના કાનજીભાઈ જેઠાભાઈ મહેશ્વરીના નિવાસસ્થાને સાદો નાસ્તો કર્યો હતો.
રાજ્યપાલશ્રીએ ભોરારા ગામના અનુસૂચિત જાતિ પરિવારના કાનજીભાઈ જેઠાભાઈ મહેશ્વરી અને તેમના પરિવારના સભ્યો સાથે સવારનો નાસ્તો કરીને કચ્છની મહેમાનગતિ અને આગતાસ્વાગતાને બિરદાવી હતી. રાજ્યપાલએ પરિવારના સભ્યો સાથે તેમના રોજિંદા જીવન, શિક્ષણ અને આજીવિકાના સ્ત્રોતો આત્મીયતાથી ચર્ચા કરી હતી.
રાજ્યપાલએ કાનજીભાઈને પરિવારના મોભી હોવાના નાતે અનુરોધ કર્યો હતો કે બાળકોમાં સતત સંસ્કારનું સિંચન કરીને તેમને જીવનમાં ઉચ્ચ શિક્ષણ અપાવજો. કોઈપણ સંજોગોમાં બાળકોનું શિક્ષણ ન છૂટે તેમ રાજ્યપાલશ્રીએ ખાસ સૂચન કર્યું હતું. આ ઉપરાંત, જીવનમાં કર્મ કરવા અને આર્થિક ઉપાર્જન માટે કોઈપણ કામને નાનું નહીં માનીને જીવન વ્યતિત કરવા રાજ્યપાલએ જણાવ્યું હતું.‌
 કાનજીભાઈના પરિવાર દ્વારા ૪ જેટલી ગાયોનું પાલન થાય છે તે જાણીને રાજ્યપાલએ અત્યંત આનંદની લાગણી વ્યક્ત કરી હતી. રાજ્યપાલશ્રીએ પરિવારજનોને ગાય આધારિત પ્રાકૃતિક કૃષિના લાભ સમજાવ્યા હતા અને ફળફળાદી ઉગાડવા માટે માર્ગદર્શન પૂરું પાડ્યું હતું. રાજ્યપાલએ કાનજીભાઈના પરિવારને લોકભવન, ગાંધીનગર પધારવા આમંત્રણ પાઠવ્યું હતું.
સવારના નાસ્તા દરમિયાન રાજ્યપાલએ કચ્છ કલેક્ટર અનિલ રાણાવસિયા, જિલ્લા વિકાસ અધિકારી ઉત્સવ ગૌતમ અને પશ્ચિમ કચ્છ પોલીસ અધિક્ષક વિકાસ સુંડા સાથેની વાતચીતમાં પ્રધાનમંત્રી નરેન્દ્રભાઈ મોદીના વિઝનથી છેલ્લા ૨૫ વર્ષમાં કચ્છ જિલ્લામાં થયેલા અભૂતપૂર્વ વિકાસની મનમૂકીને પ્રશંસા કરી હતી. જિલ્લા કલેક્ટરશ્રી સહિત અધિકારીઓએ રાજ્યપાલને કચ્છના પશુધન, સેવાભાવી સંસ્થાઓ અને જિલ્લાની ભૌગોલિક, આર્થિક તેમજ સામાજિક સ્થિતિ અંગે અવગત કરાવ્યા હતા. કચ્છના મહત્તમ ખેડૂતો પ્રાકૃતિક કૃષિ મોડેલ ફાર્મની મુલાકાત લે અને વધુને વધુ ખેડૂતો પ્રાકૃતિક કૃષિ તરફ વળે તે બાબત પર રાજ્યપાલશ્રીએ વિશેષ ભાર મૂક્યો હતો.
આ પ્રસંગે જિલ્લા કલેક્ટર અનિલ રાણાવસિયા, જિલ્લા વિકાસ અધિકારી ઉત્સવ ગૌતમ, પશ્ચિમ કચ્છ પોલીસ અધિક્ષક વિકાસ સુંડા, મુન્દ્રા એસએસપી ગૌતમ વિવેકાનંદન, ગામના સરપંચ, પ્રાંત અધિકારી અભિષેક સિન્હા, મામલતદાર કલ્પનાબેન ગોન્દિયા, નાયબ નિયામક(અનુસૂચિત જાતિ) વિનોદ રોહિત,  જિલ્લા પુરવઠા અધિકારી વિવેક બારહટ સહિત પરિવારના સભ્યો ઉપસ્થિત રહ્યા હતા