ગાંધીનગર : ગુજરાત પોલીસ વિભાગમાં ખાખી વર્ધી પહેરવાનું સ્વપ્ન સેવતા અને સ્પર્ધાત્મક પરીક્ષાઓની તૈયારી કરતા હજારો ઉમેદવારો માટે એક અત્યંત મહત્વના અને ખુશીના સમાચાર સામે આવ્યા છે. ગુજરાત સરકારના ગૃહ વિભાગ દ્વારા ‘ગ્રામ્ય સુરક્ષા કવચ યોજના’ (GSKY) હેઠળ બિનહથિયારી પોલીસ સબ ઈન્સ્પેક્ટર (PSI) ની નવી ૨૦૦ જગ્યાઓ ઊભી કરવાની સત્તાવાર મંજૂરી આપી દેવામાં આવી છે. ગૃહ વિભાગના ઠરાવ બાદ આ નવી જગ્યાઓ માટેની મંજૂરી મોહર મારી દેવાતાં યુવાનોમાં ભારે ઉત્સાહ છવાયો છે.

મુખ્ય પોલીસ અધિકારી અને પોલીસ મહાનિર્દેશક કચેરી દ્વારા વર્ષ ૨૦૨૬-૨૭ હેઠળ મોકલવામાં આવેલી નવી સેવાની દરખાસ્તને સરકારે મંજૂરી આપતાં જ રાજ્યના ગ્રામ્ય વિસ્તારોમાં કાયદો અને વ્યવસ્થાની પરિસ્થિતિ વધુ સુદ્રઢ બનશે. GSKY યોજના હેઠળ સ્વીકૃત આ ૨૦૦ નવી PSI ની જગ્યાઓ રાજ્યના વિવિધ જિલ્લાઓના ગ્રામ્ય પોલીસ સ્ટેશનોમાં ફાળવવામાં આવશે.

નિયમો, લાયકાત અને આકર્ષક પગાર ધોરણ

આ નવી જગ્યાઓ પર પસંદગી પ્રક્રિયા ગુજરાત પોલીસ ભરતી બોર્ડના પ્રવર્તમાન નીતિ-નિયમો મુજબ જ હાથ ધરવામાં આવશે. પસંદ પામેલા ઉમેદવારોને વિશેષ તાલીમ આપ્યા બાદ પારદર્શક પદ્ધતિથી પોસ્ટિંગ આપવામાં આવશે:

• લાયકાત અને ઉંમર: ઉમેદવારોની શૈક્ષણિક લાયકાત અને વયમર્યાદા રાજ્ય પોલીસ ભરતીના પ્રવર્તમાન નિયમો મુજબ રહેશે, તેમજ કમ્પ્યુટર કૌશલ્ય અને ભાષાકીય પરીક્ષાની જોગવાઈઓ લાગુ પડશે.

• પગાર ધોરણ: નવયુક્ત પીએસઆઈ ઉમેદવારોને ₹૩૬,૬૦૦ થી લઈને ₹૧,૧૬,૬૦૦ સુધીનું આકર્ષક પગાર ધોરણ ચુકવવામાં આવશે. આ યોજના માટેનો તમામ ખર્ચ રાજ્ય સરકારના બજેટમાંથી ફાળવવામાં આવશે.