અમદાવાદ : ગુજરાતના પૂર્વ મુખ્યમંત્રી શંકરસિંહ વાઘેલાના તાજેતરના એક નિવેદનને લઈને રાજ્યભરમાં રાજકીય ચર્ચા અને વિવાદ ભારે ઘેરો બન્યો છે. આ સમગ્ર વિવાદિત મામલે હવે પૂર્વ મુખ્યમંત્રીએ પોતે આગળ આવીને પ્રથમ પ્રતિક્રિયા આપી છે. તેમણે સ્પષ્ટતા કરતા જણાવ્યું છે કે તેમની વાતને ખોટી રીતે રજૂ કરીને બવંડર ઊભું કરવામાં આવ્યું છે અને કેટલાક લોકો મુદ્દાને સમજ્યા વિના જ વિરોધ કરી રહ્યા છે.

પોતાના નિવેદન પર ખુલાસો આપતાં શંકરસિંહ વાઘેલાએ આક્ષેપ કર્યો હતો કે શાસક પક્ષ ભાજપના લોકો તેમના મૂળ નિવેદનનો અર્થ સમજ્યા વગર જ વિરોધમાં ઉતરી પડ્યા છે. તેમણે જણાવ્યું હતું કે ગઈકાલે તેમણે આપેલી સ્પીચ અને વક્તવ્યને ખોટી રીતે ટ્વિસ્ટ કરીને રાજકીય રંગ આપવામાં આવી રહ્યો છે, જે તદ્દન અયોગ્ય છે.

વિરોધીઓ દ્વારા કરવામાં આવી રહેલી માફીની માંગણીને ફગાવી દેતાં પૂર્વ મુખ્યમંત્રીએ માફી માંગવાનો સ્પષ્ટ ઇનકાર કરી દીધો હતો. તેમણે જણાવ્યું હતું કે માફી માંગવાનો કોઈ પ્રશ્ન જ ઉપસ્થિત થતો નથી, કારણ કે તેમણે કોઈ સમાજનું અપમાન કર્યું નથી. તેમનું નિવેદન કેવળ અનામત વિરોધી નીતિઓ ધરાવતી સરકારના સંદર્ભમાં હતું અને તેઓ સમાજના અધિકારો માટે વાત કરી રહ્યા હતા.

વધુમાં ચોખવટ કરતાં શંકરસિંહ વાઘેલાએ જણાવ્યું હતું કે તેઓ અંગત રીતે કે જાહેર જીવનમાં કોઈ પણ સમાજ કે સમુદાયના વિરોધી નથી. તમામ સમાજ પ્રત્યે તેમને માન છે, પરંતુ તેમના નિવેદનને ખોટી રીતે રજૂ કરીને રાજકીય રોટલા શેકવાનો પ્રયાસ કરવામાં આવી રહ્યો છે.

ઉલ્લેખનીય છે કે પૂર્વ મુખ્યમંત્રીના આ નિવેદન બાદ વિવિધ સામાજિક સંગઠનો અને ભાજપ દ્વારા તેમની સામે વિરોધનો સૂર ઉચ્ચારવામાં આવ્યો હતો. આ વિવાદને કારણે રાજ્યના રાજકારણમાં ગરમાવો આવી ગયો હતો અને સોશિયલ મીડિયા પર પણ પ્રતિક્રિયાઓનો દોર શરૂ થઈ ગયો હતો.

હાલમાં પૂર્વ મુખ્યમંત્રી શંકરસિંહ વાઘેલાએ પોતાનું વલણ સ્પષ્ટ કરી દીધું હોવા છતાં, સામે પક્ષે વિરોધ કરી રહેલા સંગઠનો અને રાજકીય આગેવાનો આ સ્પષ્ટતાથી સંતોષ માને છે કે વિરોધ પ્રદર્શન ચાલુ રાખે છે તેના પર સૌની નજર રહેશે. આગામી દિવસોમાં આ વિવાદ શાંત પડે છે કે વધુ વકરે છે તે જોવું મહત્વનું બની રહેશે.