અશ્વિન વ્યાસ દ્વારા, ગાંધીનગર : સુરત શહેરમાં રવિવારે ‘નશા મુક્ત યુવા ભારત અભિયાન’ ની ખાસ થીમ હેઠળ ‘ફિટ ઇન્ડિયા સન્ડેઝ ઓન સાયકલ’ ના ૮૯મા સંસ્કરણનું અત્યંત ઉત્સાહભેર અને ભવ્ય આયોજન કરવામાં આવ્યું હતું. આ કાર્યક્રમમાં કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયા તથા ગુજરાતના નાયબ મુખ્યમંત્રી હર્ષ સંઘવી ખાસ ઉપસ્થિત રહ્યા હતા અને સાયકલ રેલીનું નેતૃત્વ કર્યું હતું. વરાછા રોડ સ્થિત સરદાર પટેલ ચોકથી પ્રારંભ થઈને ૫ કિલોમીટર દૂર આવેલા સરથાણા નેચર પાર્ક ખાતે પૂર્ણ થયેલી આ સાયકલ યાત્રામાં શાળાના વિદ્યાર્થીઓ, ખેલાડીઓ, ફિટનેસ ઉત્સાહીઓ અને વરિષ્ઠ નાગરિકો સહિત ૩,૦૦૦ થી વધુ લોકોએ ભાગ લીધો હતો.

કાર્યક્રમ દરમિયાન સભાને સંબોધતા કેન્દ્રીય મંત્રી ડૉ. મનસુખ માંડવિયાએ જણાવ્યું હતું કે, સ્વસ્થ નાગરિકો વિના વર્ષ ૨૦૪૭ સુધીમાં વિકસિત ભારતનું લક્ષ્ય પ્રાપ્ત કરવું શક્ય નથી અને સ્વસ્થ યુવાનો વિના સ્વસ્થ નાગરિકોનું નિર્માણ થઈ શકે નહીં. તેમણે વધુમાં ઉમેર્યું હતું કે સાયકલ ચલાવવી એ શારીરિક રીતે ફિટ રહેવાની શ્રેષ્ઠ પદ્ધતિ છે અને આ ઝુંબેશ માત્ર ફિટનેસ પૂરતી સીમિત ન રહેતાં દર અઠવાડિયે નવી સામાજિક થીમ સાથે સમાજના તમામ વર્ગો સુધી પહોંચી રહી છે.

ગુજરાતના નાયબ મુખ્યમંત્રી હર્ષ સંઘવીએ આ વિશિષ્ટ પહેલની સરાહના કરતા કહ્યું હતું કે દેશભરમાં આયોજિત થતી આ સાયકલિંગ ડ્રાઇવે જમ્મુ-કાશ્મીરથી લઈને કન્યાકુમારી સુધી આખા દેશને ફિટનેસના એક જ તાંતણે બાંધવાનું અદ્ભુત કામ કર્યું છે.
આ પ્રસંગે આંતરરાષ્ટ્રીય ટેબલ ટેનિસ ખેલાડી અચંતા શરથ કમલ અને હરમીત દેસાઈ, રેસલર સરિતા મોર, શિવાની પવાર, અભિનેતા જય થડેશ્વર, ‘સ્ટીલ મેન ઓફ ઈન્ડિયા’ તરીકે જાણીતા વિસ્પી ખરાડી, ‘આયર્ન ટીથ મેન’ રાકેશ સૈની અને ફિટનેસ એમ્બેસેડર ઉર્વી પરવાણી સહિત રમતગમત અને મનોરંજન ક્ષેત્રના અનેક મહાનુભાવો ઉપસ્થિત રહ્યા હતા.

કાર્યક્રમના પ્રારંભે ઝુમ્બા અને ફિઝિકલ ટ્રેનિંગ સેશનનું આયોજન કરાયું હતું, ત્યારબાદ મહાનુભાવોએ સરદાર વલ્લભભાઈ પટેલની પ્રતિમાને પુષ્પાંજલિ અર્પણ કરી રેલીને પ્રસ્થાન કરાવ્યું હતું. આ ઉપરાંત, સ્થાનિક નાગરિકોના મનોરંજન માટે ક્રિકેટ, બેડમિન્ટન, કેરમ અને ચેસ જેવી રમતો સાથેના 'લાઇવ સ્પોર્ટ્સ ઝોન'નું પણ ખાસ આયોજન કરવામાં આવ્યું હતું.