​ગાંધીનગર: ​ગુજરાત સરકાર દ્વારા દિવ્યાંગજનોની સુવિધા માટે લેવાયેલા વધુ એક મહત્વપૂર્ણ નિર્ણય અને ટેક્નોલોજીના સફળ ઉપયોગને રાષ્ટ્રીય સ્તરે મોટું સન્માન મળ્યું છે. રાજ્યમાં દિવ્યાંગ બસ પાસને હવે DigiLocker (ડિજિલોકર) સાથે લિંક કરી દેવામાં આવ્યા છે. આ સાથે જ દિવ્યાંગજનો હવે પ્લાસ્ટિક કે કાગળના ફિઝિકલ પાસ વગર પણ ST બસમાં મફત મુસાફરી કરી શકશે. ગુજરાત સરકારના આ નવીન અને પ્રજાભિમુખ અભિગમને ધ્યાને રાખીને રાજ્યને 'નેશનલ એવોર્ડ'થી નવાજવામાં આવ્યું છે.
​હવે માત્ર મોબાઈલ જ કાફી, પાસ સાચવવાની ઝંઝટમાંથી મુક્તિ
​અત્યાર સુધી દિવ્યાંગ મુસાફરોએ ST બસમાં મફત મુસાફરી માટે ફિઝિકલ પાસ સાથે રાખવો ફરજિયાત હતો. ઘણીવાર પાસ ઘરે ભૂલી જવા કે ખોવાઈ જવાના કિસ્સામાં મુસાફરોને ભારે હાલાકી ભોગવવી પડતી હતી. હવે ડિજિલોકર સાથે પાસ લિંક થઈ જતાં મુસાફરો પોતાના સ્માર્ટફોનમાં જ ડિજિટલ પાસ બતાવીને મુસાફરી કરી શકશે.

​મુખ્ય ફાયદાઓ પર એક નજર:
​ડિજિટલ ઓળખ: ડિજિલોકર દ્વારા માન્યતા પ્રાપ્ત ડિજિટલ પાસ જ ચાલશે.
​સમય અને કાગળની બચત: પાસ માટે વારંવાર લાઈનોમાં ઊભા રહેવા કે કાગળના ડોક્યુમેન્ટ્સ સાથે રાખવાની જરૂર નહીં રહે.
​
કંડક્ટર પણ સરળતાથી ડિજિટલ પાસની ખરાઈ કરી શકશે.
​ડિજિટલ ગુજરાત તરફ વધુ એક મક્કમ પગલું
​ગુજરાત ST નિગમ અને વાહન વ્યવહાર વિભાગ દ્વારા દિવ્યાંગોની સુવિધા સુચારુ બનાવવા માટે આ ડિજિટલ સિસ્ટમ અમલી બનાવવામાં આવી છે. આ સફળ મોડેલને રાષ્ટ્રીય સ્તરે સરાહવામાં આવ્યું છે અને અન્ય રાજ્યો માટે પણ તે પ્રેરણારૂપ બન્યું છે. આ સિદ્ધિ બદલ એવોર્ડ મળતાં જ રાજ્ય સરકાર અને ST નિગમની કામગીરીની સર્વત્ર પ્રશંસા થઈ રહી છે.