<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Saturday, 21st November 2026

ખેડા જિલ્લાના નડિયાદ સિવિલ હોસ્પિટલમાં કર્મચારીઓનો આક્રોશ, PF થી લઈને PM-JAY ની રકમ સુધી વિવાદ

સાઈનાથ કૃપા એસ.વી. સહાય જૂથ એજન્સી સામે કર્મચારીઓએ કર્યા ગંભીર આક્ષેપ, 5 થી 7 વર્ષથી PF જમા ન કરાયો, પગાર સ્લીપ, બોનસ અને આઈકાર્ડથી પણ વંચિત હોવાની ફરિયાદ

ખેડા તા.૨૧ : નડિયાદ સિવિલ હોસ્પિટલમાં ફરજ બજાવતા કર્મચારીઓમાં ભારે નારાજગી જોવા મળી રહી છે. સાઈનાથ કૃપા એસ.વી. સહાય જૂથ એજન્સી સામે કર્મચારીઓએ ગંભીર આક્ષેપો કરતાં સમગ્ર મામલો ચર્ચામાં આવ્યો છે. કર્મચારીઓના જણાવ્યા અનુસાર, છેલ્લા 5 થી 7 વર્ષથી PF ની રકમ જમા કરવામાં આવી નથી. આ ઉપરાંત પગાર સ્લીપ, બોનસ, આઈકાર્ડ અને જોઈનિંગ લેટર જેવી પાયાની સુવિધાઓથી પણ તેઓ વંચિત હોવાનો આક્ષેપ કરવામાં આવ્યો છે.

 

કર્મચારીઓનો સૌથી ગંભીર આક્ષેપ PF એટલે કે પ્રોવિડન્ટ ફંડની રકમને લઈને છે. તેમના જણાવ્યા પ્રમાણે, છેલ્લા પાંચથી સાત વર્ષ દરમિયાન PF ની રકમ જમા કરવામાં આવી નથી. વર્ષોથી નોકરી કરતા કર્મચારીઓના ભવિષ્યની સુરક્ષા સાથે જોડાયેલા આ મુદ્દે અનેક સવાલો ઊભા થયા છે. કર્મચારીઓએ આ મામલે જવાબદારો સામે તપાસ કરવાની માંગ કરી છે. જો PF જમા ન થયો હોય તો તેમની નિવૃત્તિ બાદની આર્થિક સુરક્ષા પર સીધી અસર પડે તેમ છે.

 

કર્મચારીઓએ આક્ષેપ કર્યો છે કે તેમને નોકરી સંબંધિત પાયાના દસ્તાવેજો અને સુવિધાઓ પણ આપવામાં આવતી નથી. પગાર સ્લીપ, બોનસ, આઈકાર્ડ અને જોઈનિંગ લેટર જેવી જરૂરી બાબતોનો અભાવ હોવાનો દાવો કરવામાં આવ્યો છે. આ સ્થિતિમાં કર્મચારીઓને પોતાની નોકરી અને મળવાપાત્ર લાભો અંગે મુશ્કેલીઓનો સામનો કરવો પડી રહ્યો હોવાની રજૂઆત કરવામાં આવી છે. કોઈ પણ સરકારી કે બેંકના કામ માટે પગાર સ્લીપ અને આઈકાર્ડ જરૂરી હોય છે, પરંતુ તે ન મળતા કર્મચારીઓ મુશ્કેલીમાં મુકાયા છે.

 

આ સમગ્ર વિવાદમાં PM-JAY એટલે કે પ્રધાનમંત્રી જન આરોગ્ય યોજના અંતર્ગત મળવાપાત્ર રકમનો મુદ્દો પણ સામે આવ્યો છે. કર્મચારીઓના જણાવ્યા અનુસાર, યોજનાના ભાગરૂપે મળવાપાત્ર રકમ કેટલાક કર્મચારીઓને ચૂકવવામાં આવી નથી. આ ઉપરાંત એજન્સીના ઓનલાઇન રેકોર્ડ અને કામગીરીમાં પારદર્શિતાને લઈને પણ કર્મચારીઓએ સવાલો ઉઠાવ્યા છે.

 

વર્ષોથી સિવિલ હોસ્પિટલમાં ફરજ બજાવતા કર્મચારીઓના હક અને ભવિષ્યની સુરક્ષાને લઈને હવે સવાલો ઊભા થયા છે. કર્મચારીઓએ ઉચ્ચ અધિકારીઓ સમક્ષ સમગ્ર મામલે નિષ્પક્ષ તપાસ કરવાની માંગ કરી છે. PF સહિતના બાકી લાભો તાત્કાલિક ચૂકવવામાં આવે અને એજન્સીની કામગીરીની ઓડિટ કરવામાં આવે તેવી પણ કર્મચારીઓએ રજૂઆત કરી છે.

(4:48 PM IST)