અમદાવાદ, તા.૧૮: આજના આધુનિક સમયમાં ફ્રિજ એ દરેક ઘરના રસોડાનો એક અવિભાજ્ય ભાગ બની ગયું છે. સામાન્ય રીતે લોકો પોતાની અનુકૂળતા મુજબ દૂધ, લીલા શાકભાજી, રાંધેલું ભોજન કે ડેરી પ્રોડક્ટ્સ ફ્રિજના કોઈપણ શેલ્ફ પર ગોઠવી દેતા હોય છે. પરંતુ મોટાભાગના લોકો એ વાતથી અજાણ હોય છે કે ફ્રિજના દરેક ભાગનું તાપમાન એકસરખું હોતું નથી. જો ખોરાકને તેના યોગ્ય તાપમાન મુજબ યોગ્ય જગ્યાએ રાખવામાં ન આવે, તો તે ઝડપથી બગડી શકે છે અને તેમાં હાનિકારક બેક્ટેરિયા ફેલાઈને ખોરાકને દૂષિત (Cross-contamination) કરી શકે છે.

નિષ્ણાતોના જણાવ્યા અનુસાર, ફ્રિજનું આદર્શ તાપમાન 0°C થી 5°C વચ્ચે હોવું જોઈએ. ફ્રિજના દરેક ખાના માટે ચોક્કસ નિયમો છે. સૌથી ઉપરના શેલ્ફ પર રેડી-ટુ-ઈટ વસ્તુઓ જેમ કે દહીં, પનીર અને બચેલું રાંધેલું ભોજન એરટાઈટ કન્ટેનરમાં રાખવું જોઈએ. વચ્ચેના શેલ્ફ પર માખણ, સોસ, સલાડ ડ્રેસિંગ અને મીઠાઈઓ મૂકવી હિતાવહ છે. સૌથી નીચેના શેલ્ફ પર કાચું માંસ, ચિકન કે માછલી સીલબંધ પેકિંગમાં રાખવા જોઈએ જેથી તેનો રસ અન્ય ખોરાક પર ન પડે, જ્યારે નીચે આપેલા ક્રિસ્પર ડ્રોઅરમાં માત્ર તાજા ફળો અને લીલા શાકભાજી સ્ટોર કરવા જોઈએ.

ઘણા લોકો દૂધ અને ઈંડા ફ્રિજના દરવાજામાં મૂકવાની મોટી ભૂલ કરે છે. ફ્રિજનો દરવાજો વારંવાર ખૂલ-બંધ થતો હોવાથી ત્યાં તાપમાનમાં સતત વધ-ઘટ થાય છે. તેથી દરવાજાના શેલ્ફમાં માત્ર જ્યૂસ, જામ, અથાણું અને સોડા બોટલ્સ જેવી આઈટમ્સ જ રાખવી જોઈએ. સામાન્ય રીતે યોગ્ય સ્ટોરેજથી દહીં ૭ થી ૧૦ દિવસ, ચીઝ ૧ થી ૪ અઠવાડિયા અને ઈંડા ૩ થી ૫ અઠવાડિયા સુધી સુરક્ષિત રહે છે. યોગ્ય ગોઠવણીથી ખોરાકની તાજગી અને પૌષ્ટિકતા લાંબા સમય સુધી જાળવી શકાય છે.