ગાંધીનગર, તા. 17  : રાજ્યના વહીવટી તંત્રમાં આગામી દિવસોમાં મોટા ફેરફારો થવાની ચર્ચાએ જોર પકડ્યું છે. સચિવાલયના સૂત્રોના જણાવ્યા મુજબ પોલીસ વિભાગમાં IPS અધિકારીઓની બદલીથી લઈને રાજ્યના નવા મુખ્ય સચિવની નિમણૂક સુધીના મુદ્દે અટકળો ચાલી રહી છે. વર્તમાન મુખ્ય સચિવ આગામી જૂન મહિનાના અંતમાં વયનિવૃત્ત થઈ રહ્યા છે જેના કારણે નવા મુખ્ય સચિવ કોણ બનશે તેને લઈને અનેક નામો ચર્ચામાં છે.

વહીવટી વર્તુળોમાં ચર્ચા છે કે સરકાર મુખ્ય સચિવ પદ માટે ત્રણ સિનિયર IAS અધિકારીઓના નામ પર વિચાર કરી રહી છે. જેમાં વર્તમાન અધિક મુખ્ય સચિવ કક્ષાના બે અધિકારી અને કેન્દ્રમાં પ્રતિનિયુક્તિ પર રહેલા એક અધિકારીનું નામ મોખરે છે. મુખ્ય સચિવની નિમણૂક સાથે અન્ય કેટલાક વિભાગોના સચિવોની પણ ફેરબદલી થાય તેવી શક્યતા છે. ખાસ કરીને ગૃહ, મહેસૂલ અને શહેરી વિકાસ વિભાગમાં ફેરફાર થઈ શકે છે.

આ ઉપરાંત રાજ્યના પોલીસ તંત્રમાં પણ મોટા પાયે બદલીઓની તૈયારી ચાલી રહી હોવાનું જાણવા મળ્યું છે. ચૂંટણી બાદ ઘણા જિલ્લાઓમાં SP અને રેન્જમાં IG કક્ષાના અધિકારીઓની બદલી બાકી છે. અમદાવાદ, સુરત, વડોદરા અને રાજકોટ જેવા મોટા શહેરોના પોલીસ કમિશનરની બદલીની પણ અટકળો છે. ગૃહ વિભાગ દ્વારા આગામી સપ્તાહે બદલીઓનું લિસ્ટ જાહેર થઈ શકે છે.

સચિવાલયના સૂત્રોનું કહેવું છે કે આગામી મહિનાઓમાં વાઇબ્રન્ટ ગુજરાત અને અન્ય મોટા કાર્યક્રમોની તૈયારીઓને ધ્યાનમાં રાખીને સરકાર વહીવટી તંત્રને વધુ ગતિશીલ બનાવવા માંગે છે. જે અધિકારીઓનું પ્રદર્શન સારું રહ્યું છે તેમને મહત્વની જવાબદારી સોંપવામાં આવશે. જોકે આ તમામ ફેરફારો અંગે મુખ્યમંત્રી કચેરી તરફથી હજુ સુધી કોઈ સત્તાવાર જાહેરાત કરવામાં આવી નથી. અંતિમ નિર્ણય મુખ્યમંત્રી સ્તરેથી લેવામાં આવશે.