રાજકોટ: કચ્છના મુન્દ્રા બંદરેથી દેશના ઇતિહાસના સૌથી મોટા ડ્રગ્સ કન્સાઇનમેન્ટ પૈકીના એક એવા રૂપિયા ૧૧૮૦ કરોડની કિંમતના હેરોઇન પકડાવાના ચકચારી કેસમાં એક અત્યંત ચોંકાવનારો આંતરરાષ્ટ્રીય ખુલાસો સામે આવ્યો છે. ગુજરાતના મુખ્ય પોલીસ વડા (DGP) ડૉ. કે.એલ.એન. રાવે 'અકિલા' સાથેની ખાસ વાતચીતમાં આ અબજો રૂપિયાના વૈશ્વિક ડ્રગ નેટવર્કની તમામ કડીઓ અને રૂટ જાહેર કર્યા છે. પોલીસ વડાના આ સત્તાવાર ખુલાસાથી આંતરરાષ્ટ્રીય સ્તરે ચાલતા નાર્કો-ટેરરિઝમ અને દરિયાઈ માર્ગે થતી સ્મગલિંગના મજબૂત નેટવર્ક પરથી પડદો ઊંચકાયો છે.

મુખ્ય પોલીસ વડા ડૉ. કે.એલ.એન. રાવે ડ્રગ્સના આ આંતરરાષ્ટ્રીય કનેક્શન અંગે વિગતવાર માહિતી આપતા જણાવ્યું હતું કે, મુન્દ્રા બંદરેથી જપ્ત કરવામાં આવેલો ૧૧૫ કિલોગ્રામ શુદ્ધ હેરોઇનનો આ જંગી જથ્થો મૂળ દક્ષિણ અમેરિકાના બ્રાઝિલ દેશમાંથી ‘MSC’ નામના વિશાળ આંતરરાષ્ટ્રીય માલવાહક જહાજમાં લોડ કરવામાં આવ્યો હતો. આ જહાજ બ્રાઝિલથી નીકળ્યા બાદ લેટિન અમેરિકાના વિવિધ દેશો અને યુનાઇટેડ સ્ટેટ્સ ઓફ અમેરિકા (USA) ના દરિયાઈ બંદરો થઈને પાકિસ્તાનના કરાચી માર્ગે ભારતીય સરહદમાં એટલે કે કચ્છના મુન્દ્રા ખાતે પહોંચ્યું હતું. પ્રાથમિક તપાસ અને પૂછપરછમાં એ વાત પણ સ્પષ્ટ થઈ છે કે, આ કરોડો રૂપિયાનું કન્સાઇનમેન્ટ સ્થાનિક સ્તરે ગુજરાતમાં વપરાશ માટે નહીં, પરંતુ દેશની રાજધાની દિલ્હી ખાતે કોઈ મોટા ડ્રગ માફિયાને ડિલિવર કરવાનું હતું.

મધદરિયે ખેલાયો સનસનાટીપૂર્ણ ઓપરેશનનો રોમાંચ:

આ કરોડોના ડ્રગ્સને પકડી પાડવા માટે ગુજરાત એન્ટી ટેરરિસ્ટ સ્ક્વોડ (ATS), ભારતીય કોસ્ટ ગાર્ડ (Indian Coast Guard) અને પશ્ચિમ કચ્છ લોકલ ક્રાઈમ બ્રાંચ અંતર્ગત આવતી સ્પેશિયલ ઓપરેશન ગ્રુપ (SOG) ની ટીમો દ્વારા ગત ૨૬મી મેના રોજ મધદરિયે એક સંયુક્ત ઓપરેશન પાર પાડવામાં આવ્યું હતું. સુરક્ષા એજન્સીઓની ઘેરાબંધી જોઈને ડ્રગ માફિયાઓએ પુરાવાનો નાશ કરવા માટે ડ્રગ્સની થેલીઓ દરિયામાં ફેંકી દીધી હતી, પરંતુ સજ્જ ટીમોએ બોટમાંથી હેરોઇનનો મૂળ જથ્થો રિકવર કરવાની સાથે દરિયાના પાણીમાં ફેંકી દેવાયેલી અન્ય પાંચ શંકાસ્પદ થેલીઓ પણ શોધી કાઢી હતી. આ સમગ્ર આંતરરાષ્ટ્રીય ગુનાહિત કાવતરામાં સીધી રીતે સંડોવાયેલા ત્રણ મુખ્ય શખ્સોની સ્થળ પરથી જ ધરપકડ કરી લેવામાં આવી છે.

કેન્દ્રીય એજન્સીઓ તપાસમાં જોડાઈ, દિલ્હી સુધી રેડની તૈયારી:

બ્રાઝિલથી શરૂ થઈને વાયા કરાચી થઈ દિલ્હી સુધી વિસ્તરેલા આ હાઈ-પ્રોફાઈલ ડ્રગ રેકેટના મૂળ સુધી પહોંચવા માટે હવે સ્થાનિક પોલીસ અને એટીએસની સાથે દેશની પ્રતિષ્ઠિત સેન્ટ્રલ કસ્ટમ્સ (Customs) સહિતની અન્ય કેન્દ્રીય તપાસ એજન્સીઓ પણ સક્રિય રીતે જોડાઈ ગઈ છે. ધરપકડ કરાયેલા ત્રણેય આરોપીઓના રિમાન્ડ મેળવીને તેમની આકરી પૂછપરછ શરૂ કરાઈ છે, જેથી એ જાણી શકાય કે બ્રાઝિલમાં આ જથ્થો કોણે મોકલ્યો હતો અને દિલ્હીમાં તે કોને સપ્લાય થવાનો હતો. આ નેટવર્કમાં દેશ-વિદેશના કયા મોટા માથાઓ સામેલ છે તેની અત્યંત ગુપ્ત અને ઊંડી તપાસ હાલ તેજ ગતિએ ચાલી રહી છે.