અરવલ્લી જિલ્લાના મેઘરજ રાજકારણમાં પક્ષપલટાનો મુદ્દો ફરી એકવાર ગરમાયો છે. મેઘરજ તાલુકા પંચાયતના પ્રમુખ અને ઉપપ્રમુખ સામે પક્ષાંતર ધારાહેઠળ કાયદેસરની કાર્યવાહી શરૂ કરવામાં આવી છે. કોંગ્રેસ પક્ષના આ બંને સભ્યોએ પક્ષમાં હોવા છતાં ભાજપની તરફેણમાં આંગળી ઊંચી કરીને મતદાન કર્યું હતું, જેને પગલે તેમને ગેરલાયક ઠેરવવા માટે પક્ષ દ્વારા સત્તાવાર અરજી કરવામાં આવી હતી.

આ મામલે પ્રમુખ ભરતભાઈ ખાંટઅને ઉપપ્રમુખ અરવિંદભાઈ ખરાડીને કારણદર્શક નોટિસ પાઠવવામાં આવી છે. આગામી 22 જુલાઈના રોજ ગાંધીનગર ખાતે નામોદિષ્ટ સમક્ષ આ કેસની સુનાવણી હાથ ધરાશે. જો આ સુનાવણીમાં તેઓ હાજર નહીં રહે, તો તેમની સામે એકતરફી કાર્યવાહી કરવાની ચેતવણી પણ આપવામાં આવી છે. આ સુનાવણીના અંતિમ નિર્ણય પર હાલ સમગ્ર અરવલ્લી જિલ્લાની નજર મંડાયેલી છે.