પાટણ : પાટણ જિલ્લાના રાધનપુર તાલુકાના હાજીપુર ગામે દલિત સમાજના યુવકના લગ્નના વરઘોડા પર હુમલાની શરમજનક ઘટના સામે આવી છે. 'ઘોડી પર બેસવાનો તને કોઈ હક નથી' એમ કહીને ગામના જ કેટલાક ઉપલા વર્ગના શખ્સોએ વરરાજા અને જાનૈયાઓ પર જાતિસૂચક ગાળો ભાંડી પથ્થરમારો કર્યો હતો.

પ્રાપ્ત વિગતો મુજબ, હાજીપુર ગામના જયેશ પરમાર નામના દલિત યુવકના લગ્ન હતા. શુક્રવારે રાત્રે લગભગ 10 વાગ્યે વરઘોડો ગામના મુખ્ય માર્ગ પરથી પસાર થઈ રહ્યો હતો. તે દરમિયાન રાજુજી ઠાકોર, ભરતજી ઠાકોર સહિત 5 શખ્સોએ વરઘોડો અટકાવી દીધો હતો. આરોપીઓએ વરરાજા જયેશને ઘોડી પરથી નીચે ઉતારી દેવા દબાણ કર્યું અને કહ્યું, "તારા બાપ-દાદા પણ ઘોડી પર બેઠા નથી, તું કેમ બેઠો છે?"

બોલાચાલી બાદ આરોપીઓએ જાનૈયાઓને જાતિસૂચક અપશબ્દો કહ્યા અને પથ્થરમારો શરૂ કરી દીધો. ઘટનામાં વરરાજાના કાકા અને બે જાનૈયાને સામાન્ય ઈજાઓ પહોંચી હતી. જાનમાં ભયનો માહોલ સર્જાયો હતો. ઘટનાની જાણ થતા રાધનપુર પોલીસ ઘટનાસ્થળે દોડી આવી હતી અને મામલો થાળે પાડ્યો હતો.

પોલીસે ચુસ્ત બંદોબસ્ત વચ્ચે મોડી રાત્રે વરઘોડો કાઢી લગ્નવિધિ પૂર્ણ કરાવી હતી. વરરાજા જયેશ પરમારની ફરિયાદના આધારે રાધનપુર પોલીસે 5 શખ્સો સામે IPC કલમ 323, 504, 506(2), 143, 147 અને એટ્રોસિટી એક્ટની કલમ 3(1)(r), 3(1)(s), 3(2)(va) મુજબ ગુનો નોંધ્યો છે.

પાટણ જિલ્લા પોલીસ વડા વિજય પટેલે જણાવ્યું કે, "આ ઘટના અત્યંત ગંભીર છે. આરોપીઓને ઝડપી લેવા SIT ની રચના કરવામાં આવી છે. સમાજમાં જાતિગત ભેદભાવ સહન કરવામાં નહીં આવે." હાલ ગામમાં તંગદિલીને પગલે પોલીસ બંદોબસ્ત ગોઠવી દેવાયો છે.