ગાંધીનગર:ગૃહ વિભાગના જેલ પ્રભાગ હેઠળ નવી નિમણૂક મેળવનાર વર્ગ-૧ અને વર્ગ-૨ ના કુલ ૧૧ નવયુવાન અધિકારીઓ માટે આજે પાટનગર ગાંધીનગરના સ્વર્ણિમ સંકૂલ ખાતે એક વિશેષ પદગ્રહણ અને નિમણૂકપત્ર વિતરણ કાર્યક્રમનું ગરિમામય આયોજન કરવામાં આવ્યું હતું. આ ભવ્ય સમારોહમાં જેલ પ્રભાગના રાજ્ય મંત્રી કમલેશભાઈ પટેલ અને ઉપસ્થિત વરિષ્ઠ મહાનુભાવોના હસ્તે તમામ નવનિયુક્ત અધિકારીઓને સત્તાવાર નિમણૂકપત્રો એનાયત કરવામાં આવ્યા હતા. આ નવી નિમણૂકો થકી ગુજરાતની જેલ વ્યવસ્થા, વહીવટી તંત્ર અને સુરક્ષા વ્યવસ્થાને એક નવી આધુનિક શક્તિ અને ગતિ મળશે.
આ ગૌરવપૂર્ણ પ્રસંગે સંબોધન કરતા રાજ્ય મંત્રી કમલેશભાઈ પટેલે જણાવ્યું હતું કે, વર્તમાન સમયમાં જેલ એ માત્ર કેદીઓ માટે સજા ભોગવવાનું બંધિયાર સ્થળ નથી રહ્યું, પરંતુ તે એક ઉત્તમ ‘પ્રાયશ્ચિત ભવન’ અને સામાજિક સુધારા ગૃહ બન્યું છે. તેમણે નવનિયુક્ત અધિકારીઓને પ્રોત્સાહિત કરતા સુંદર શબ્દોમાં ઉમેર્યું કે, જ્યારે આપણે પૂરી પ્રામાણિકતા અને નિષ્ઠાથી પોતાની ફરજ નિભાવીએ છીએ, ત્યારે ઈશ્વર આપણા પરિવારની પણ આપોઆપ ચિંતા કરે છે. મંત્રીશ્રીએ ભગવાન શ્રીકૃષ્ણના પવિત્ર 'કર્મયોગના સિદ્ધાંત'ને યાદ કરી તમામ અધિકારીઓને રાજ્યમાં શ્રેષ્ઠ કામગીરી કરવા પ્રેરણા આપી હતી. તેમણે સ્પષ્ટ કર્યું હતું કે, જેલમાં આવનાર દરેક વ્યક્તિ જન્મજાત ગુનેગાર કે ગુનાહિત માનસિકતા ધરાવતી નથી હોતી, પરંતુ ઘણીવાર લોકો સંજોગોવશાત પણ ગુના તરફ ધકેલાયા હોય છે. તેથી, વહીવટી તંત્રએ હંમેશા માનવતા અને સંવેદનશીલતાપૂર્વક કામગીરી કરવી જોઈએ.
કેદીઓની માનસિક તંદુરસ્તી પર વિશેષ ભાર મૂકતાં મંત્રીશ્રીએ કહ્યું કે, કેદીઓના શારીરિક સ્વાસ્થ્ય માટે સરકાર પૂરતા આયોજન અને તબીબી સારવાર કરી જ રહી છે, પરંતુ જેલમાં આવતા કેદીઓની માનસિક તંદુરસ્તી જળવાઈ રહે તે ખૂબ જ અનિવાર્ય છે. કેદીઓને માનસિક રીતે મજબૂત અને સકારાત્મક કરવા માટે સૌપ્રથમ જેલ અધિકારીઓ અને કર્મચારીઓએ પોતે માનસિક રીતે પાવરફુલ અને મજબૂત બનવું પડશે. તેમણે સાબરમતી સેન્ટ્રલ જેલનું જીવંત ઉદાહરણ આપતા જણાવ્યું કે, ત્યાં કેદીઓ દ્વારા સુથારી કામ, પ્રીમિયમ ફર્નિચર બનાવવું અને હાઈજીનિક ફૂડ પેકિંગ જેવા અનેક નાના-મોટા લઘુ ઉદ્યોગો સફળતાપૂર્વક ચાલી રહ્યા છે. આ વ્યવસાયિક તાલીમથી કેદીઓ જેલ મુક્ત થઈને બહાર જઈને પણ સમાજમાં આત્મનિર્ભર થઈ શકશે. આ ઉપરાંત જેલમાં સજા કાપતી મહિલાઓ અને જો તેમની સાથે કોઈ માસૂમ બાળક હોય તો તેના પ્રત્યે ખાસ માનવતાવાદી અને અત્યંત સંવેદનશીલ અભિગમ અપનાવવા તેમણે ટકોર કરી હતી.
મુખ્યમંત્રી ભૂપેન્દ્રભાઈ પટેલના સક્ષમ માર્ગદર્શનમાં અને નાયબ મુખ્યમંત્રી હર્ષભાઈ સંઘવીના કુશળ નેતૃત્વ હેઠળ રાજ્ય સરકાર દ્વારા ગુજરાતના જેલ તંત્રને વધુ સશક્ત, હાઈટેક, આધુનિક અને કાર્યક્ષમ બનાવવા માટે સતત ભગીરથ પ્રયાસો કરવામાં આવી રહ્યા છે. મંત્રીશ્રીએ વિશ્વાસ વ્યક્ત કર્યો હતો કે, નવી નિમણૂંક પામનાર યુવા અધિકારીઓ જોડાવાથી જેલ વહીવટ, સુરક્ષા વ્યવસ્થા અને સુધારાત્મક સેવાઓને વધુ વેગ મળશે. તેમણે તમામ અધિકારીઓને આહ્વાન કર્યું હતું કે, ગુજરાતમાં જ્યાં પણ તમારું સત્તાવાર પોસ્ટિંગ થાય, ત્યાં જેલ સુધારણાના એવા શ્રેષ્ઠ અને નવતર કાર્યો કરો કે સમગ્ર દેશમાં ગુજરાતની જેલો અને આપણા ગૃહ વિભાગની સરાહનીય નોંધ લેવાય અને રાજ્યનું ગૌરવ વધે.
આ ઉચ્ચ સ્તરીય નિમણૂકપત્ર વિતરણ પ્રસંગે ગૃહ વિભાગના અગ્ર સચિવ નિપુણા તોરવણે, ગૃહ વિભાગ તેમજ જેલ પ્રભાગના અન્ય વરિષ્ઠ ઉચ્ચ અધિકારીઓ અને નવી નિમણૂંક પામેલા તમામ અધિકારીઓ ગણવેશમાં ઉપસ્થિત રહ્યા હતા.
**નિમણૂક મેળવનાર વર્ગ-૧ અને વર્ગ-૨ ના અધિકારીઓની સત્તાવાર યાદી:**
**અધિક્ષક, મધ્યસ્થ જેલ / પોરબંદર ખાસ જેલ (વર્ગ-૧):**
૧. અતુલકુમાર છગનભાઇ મકવાણા
૨. કુ. ડિમ્પલ અર્જુનભાઈ પટેલ
૩. ગૌતમકુમાર હरेશભાઇ વ્યાસ
૪. સૌરભકુમાર લક્ષ્મણભાઇ રાઠોડ
૫. શૈલેષકુમાર રમણલાલ સગર
**જેલર ગ્રુપ-૧ (પુરુષ) (વર્ગ-૨):**
૧. પરેશભાઇ વશરામભાઇ ડાંગર
૨. અનીશ હસન સુમરા
૩. ડાહ્યાભાઇ મોડાભાઇ ડીઘારી
૪. સાગરકુમાર ઓઘડભાઇ કલસરીયા
૫. આર્યન કરશનભાઇ પટેલ
૬. મેહુલભાઇ ચીકાભાઇ ધરજીયા