અશ્વિન વ્યાસ દ્વારા, ગાંધીનગર : અસત્ય પર સત્ય અને અધર્મ પર ધર્મના વિજયના પ્રતિક સમાન પવિત્ર વિજયાદશમી (દશેરા) પર્વ નિમિત્તે રાજ્યના મુખ્યમંત્રી ભુપેન્દ્રભાઈ પટેલ દ્વારા સમસ્ત ગુજરાતના નાગરિકોને હાર્દિક શુભેચ્છાઓ પાઠવવામાં આવી છે. આ પર્વ અસુરી શક્તિઓ પર દૈવી શક્તિઓના વિજયનું અનોખું ઉમંગ પર્વ હોવાનું તેમણે જણાવ્યું છે.

આંતરિક નકારાત્મકતા પર વિજયનો સંદેશ:
મુખ્યમંત્રીશ્રીએ વિજયાદશમીના આ પર્વને માત્ર બાહ્ય વિજય નહીં પરંતુ મનુષ્યની ભીતર રહેલા આંતરિક શત્રુઓ અને તમામ પ્રકારની નકારાત્મકતાઓ પર વિજય મેળવવાનો વિજયોત્સવ ગણાવ્યો છે. શક્તિની આરાધનાના નવરાત્રી ઉત્સવની પૂર્ણાવતી બાદ આવતું આ વિજયાદશમીનું પર્વ સમાજમાં પરસ્પર પ્રેમ, ભાઈચારો, સૌહાર્દ અને સામાજિક સમરસતાની સાથે 'સૌના સાથ, સૌના વિકાસ' ની નેમને સાર્થક કરનારું બને તેવી ઊંડી અપેક્ષા તેમણે વ્યક્ત કરી છે.