અમદાવાદ : વડાપ્રધાન નરેન્દ્ર મોદીના જનસેવા, સાધના અને સુશાસનના ૨૫ વર્ષ પૂર્ણ થવાના અવસરે રાજ્યભરમાં યોજાઈ રહેલા 'સેવા સંકલ્પ અભિયાન' અંતર્ગત ગુજરાતના મુખ્યમંત્રી ભૂપેન્દ્ર પટેલે અમદાવાદની પ્રખ્યાત સાબરમતી મધ્યસ્થ જેલની એક વિશેષ અને પ્રેરણાદાયી મુલાકાત લીધી હતી. આ મુલાકાત દરમિયાન મુખ્યમંત્રીએ કેદીઓ સાથે સહજ અને હળવાશથી સંવાદ કર્યો હતો, જેણે જેલના વાતાવરણને એકદમ હકારાત્મક બનાવી દીધું હતું. મુખ્યમંત્રીએ હસતા મુખે કેદીઓ સાથે વાતચીત કરતા જણાવ્યું હતું કે જેલમાં કેદીઓ દ્વારા બનાવવામાં આવતી વિવિધ વસ્તુઓ આજે સામાન્ય નાગરિકો સુધી પહોંચી રહી છે અને અહીંના ભજિયા પણ ખૂબ પ્રખ્યાત છે.

આ મુલાકાત દરમિયાન મુખ્યમંત્રી ભૂપેન્દ્ર પટેલે કેદીઓ સાથે બેસીને પ્રસિદ્ધ પદ 'વૈષ્ણવજન તો તેને રે કહીએ...' ભજનનું શ્રવણ કર્યું હતું. ત્યારબાદ તેમણે કેદીઓને માર્ગદર્શન આપતા જણાવ્યું હતું કે જીવનમાં એક નાની ભૂલ પણ મોટું નુકસાન નોતરી શકે છે, અને તેનું પરિણામ સમગ્ર પરિવારને ભોગવવું પડે છે, તેથી દરેક વ્યક્તિએ સંયમના માર્ગે ચાલવું જોઈએ. મુખ્યમંત્રીએ ઉમેર્યું હતું કે વડાપ્રધાન સમગ્ર દેશને પોતાનો પરિવાર માને છે, અને એ જ ભાવનાથી રાજ્ય સરકાર પણ જેલના કેદીઓને જરૂરી તમામ સુવિધાઓ અને કલ્યાણકારી લાભો મળી રહે તેની પૂરતી કાળજી રાખી રહી છે. તેમણે કેદીઓને પણ આ 'સેવા સંકલ્પ અભિયાન'માં સક્રિય યોગદાન આપવા માટે પ્રેરિત કર્યા હતા.

ઐતિહાસિક ઓરડાઓની મુલાકાત અને કેદીઓની કલાકારીગરીની પ્રશંસા

કાર્યક્રમ દરમિયાન મુખ્યમંત્રીએ જેલના કેદીઓને પોતાના હસ્તે ફળોનું વિતરણ કર્યું હતું. આ સાથે જ તેમણે કેદીઓના કૌશલ્ય અને પુનર્વસન માટે કાર્યરત કોમ્પ્યુટર સેન્ટર, સુથારીકામ, વણાટકામ અને બુક બાઇન્ડિંગ સેન્ટરની ઝીણવટભરી મુલાકાત લીધી હતી અને કેદીઓ દ્વારા તૈયાર કરવામાં આવેલી વિવિધ ચીજવસ્તુઓની ખરીદી કરીને તેમનો ઉત્સાહ વધાર્યો હતો. આઝાદીની લડત દરમિયાન રાષ્ટ્રપિતા મહાત્મા ગાંધી સાથે જોડાયેલી આ જેલના ઇતિહાસને યાદ કરતા મુખ્યમંત્રીએ લોહપુરુષ સરદાર વલ્લભભાઈ પટેલ, રાષ્ટ્રીય શાયર ઝવેરચંદ મેઘાણી, અબ્બાસ તૈયબજી, રવિશંકર મહારાજ અને રસિકલાલ પરીખ જેવા મહાનુભાવોએ જે ઓરડાઓમાં કેદવાસ ભોગવ્યો હતો તે ઐતિહાસિક ઓરડાઓની પણ મુલાકાત લીધી હતી. આ મહત્વપૂર્ણ મુલાકાત વેળાએ રાજ્યની તમામ જેલોના વડા ડીજીપી કે.એલ.એન. રાવ, મુખ્યમંત્રીના અધિક અગ્ર સચિવ વિક્રાંત પાંડે અને સાબરમતી જેલના સુપરિન્ટેન્ડેન્ટ ગૌરવ અગ્રવાલ સહિતના શીર્ષ અધિકારીઓ ઉપસ્થિત રહ્યા હતા.