વડોદરા : વડોદરા શહેરમાં કાયદો અને વ્યવસ્થાની સ્થિતિ તેમજ પોલીસ તંત્રની કામગીરી સામે ગંભીર સવાલો ઊભા કરતી એક અત્યંત ચકચારી ઘટના સામે આવી છે, જ્યાં મદદ માટે ઝોન-૧ ના ડીસીપીને ફોન કરનાર યુવક અને તેના ભાઈને પોલીસ સ્ટેશનમાં ગોંધી રાખીને ઢોર માર મારવાના ગંભીર આક્ષેપો મામલે જ્યુડિશિયલ મેજિસ્ટ્રેટ ફર્સ્ટ ક્લાસ કોર્ટે ગોરવા પોલીસ સ્ટેશનના પીઆઈ કિરીટ લાઠીયા સામે ગુનો નોંધવાનો સખત આદેશ આપ્યો છે.

પ્રાપ્ત વિગતો અનુસાર, ગત ૪ નવેમ્બર ૨૦૨૬ની રાત્રે મધુનગર બ્રિજ પાસે એક અકસ્માત સર્જાયા બાદ ડ્રિન્ક એન્ડ ડ્રાઇવની હાલતમાં રહેલા મોઈન પઠાણ નામના શખ્સે આસપાસના વિસ્તારમાં ભારે હોબાળો મચાવી ભયનું વાતાવરણ ઊભું કર્યું હતું, અને તે દરમિયાન રોષે ભરાયેલા લોકટોળા દ્વારા તેની સાથે ઝપાઝપી તથા મારપીટ કરવામાં આવી હતી, જેની માહિતી મળતા જ પોલીસે સ્થળ પર પહોંચીને કાયદો અને વ્યવસ્થા કાબૂમાં લઈ ડ્રિન્ક એન્ડ ડ્રાઇવનો ગુનો નોંધ્યો હતો.

બીજી બાજુ, ફરિયાદી પક્ષના વકીલ અને આક્ષેપો મુજબ તે રાત્રે મોઈન પર અસામાજિક તત્વો દ્વારા હુમલો કરવામાં આવ્યો હતો અને કંટ્રોલ રૂમમાંથી કોઈ મદદ ન મળતા તેમણે સીધો ઝોન-૧ ના ડીસીપીનો સંપર્ક સાધ્યો હતો, પરંતુ ત્યારબાદ પોલીસે ઉશ્કેરાઈને મદદ માંગનાર યુવક અને તેના ભાઈને પોલીસ સ્ટેશને બોલાવીને ગોંધી રાખ્યા હતા અને બેરહેમીપૂર્વક માર માર્યો હતો.

આ મામલે બચાવ પક્ષ તરફથી સ્પષ્ટતા કરતા PI કિરીટ લાઠીયાએ જણાવ્યું હતું કે આ તમામ આક્ષેપો તદ્દન પાયાવિહોણા અને બનાવટી છે, કારણ કે આક્ષેપ કરનાર વ્યક્તિનો અગાઉથી જ ગંભીર ગુનાહિત ઇતિહાસ રહ્યો છે અને પોલીસ પર દબાણ લાવવા માટે આવા ખોટા આરોપો મૂકવામાં આવી રહ્યા છે, તેમજ ન્યાયતંત્ર પર પૂર્ણ વિશ્વાસ હોવાનું કહીને કાયદેસરની રજૂઆત કરવાની વાતચીત કરી હતી.

સયાજી હોસ્પિટલની તબીબી તપાસમાં પણ યુવક નશામાં હોવાનું અને લોકટોળા દ્વારા માર માર્યો હોવાનું સામે આવ્યું હતું તેમ છતાં ઉચ્ચ કક્ષાની રજૂઆતો અને ન્યાયિક પ્રક્રિયાના અંતે કોર્ટે સમગ્ર પ્રકરણમાં પીઆઈ વિરુદ્ધ ગુનો નોંધીને તપાસ કરવાનો આદેશ આપતા વડોદરા પોલીસ બેડામાં ભારે ચકચાર મચી ગઈ છે.