અમદાવાદ-ઇન્દોર નેશનલ હાઈવે પર આવેલા ધડેલા ગામ નજીક કાર અને ટ્રક વચ્ચે ગમખ્વાર ટ્રિપલ અકસ્માત સર્જાયો છે. આ અકસ્માતને પગલે હાઈવે પર વાહનોની લાંબી કતારો લાગી ગઈ હતી અને ભારે ટ્રાફિક જામની સ્થિતિ સર્જાઈ હતી. રાહતની વાત એ છે કે, કારમાં સવાર તમામ મુસાફરોનો આબાદ બચાવ થતાં મોટી જાનહાનિ ટળી છે, જ્યારે સામાન્ય ઈજાગ્રસ્તોને તાત્કાલિક ૧૦૮ એમ્બ્યુલન્સ મારફતે નજીકની હોસ્પિટલ ખસેડાયા છે. ઘટનાની જાણ થતાં જ લીમખેડા પોલીસનો કાફલો ઘટનાસ્થળે દોડી ગયો હતો અને હાઈવે પરથી વાહનો હટાવી ટ્રાફિક હળવો કરવાની કામગીરી શરૂ કરી દેવામાં આવી છે.