(ભરત શાહ દ્વારા )નર્મદા: નર્મદા જિલ્લામાં આવેલા કરજણ ડેમની જમણા કાંઠાની કેનાલ પાસે ચોમાસા દરમિયાન ધોવાઈ ગયેલા રસ્તાને લઈને હવે સ્થાનિક ખેડૂતોમાં ભારે મુશ્કેલી અને નારાજગી જોવા મળી રહી છે.
ચોમાસાની ઋતુ દરમિયાન વરસાદી પાણીના કારણે કેનાલ પાસેનો રસ્તો ધોવાઈ જતાં હાલ આ માર્ગ પરથી અવરજવર કરવી ખેડૂતો માટે મુશ્કેલ બની ગઈ છે. ખાસ કરીને ખેતરોમાં ખેતીકામ માટે જતાં ખેડૂતોને ભારે હાલાકીનો સામનો કરવો પડી રહ્યો છે.
ખેડૂતો માટે આ રસ્તો માત્ર અવરજવરનું સાધન નથી, પરંતુ તેમની રોજિંદી ખેતીની કામગીરી સાથે જોડાયેલો મહત્વનો માર્ગ છે. ખેતરમાં જવા માટે, ખેતીનાં સાધનો લઈ જવા માટે તેમજ પાકની દેખરેખ રાખવા માટે આ રસ્તાનો ઉપયોગ કરવામાં આવે છે. પરંતુ રસ્તાની હાલત ખરાબ થઈ જતાં ખેડૂતોને મુશ્કેલી વેઠવી પડી રહી છે.
ગામના ખેડૂત અનિલભાઈ હિમંતભાઈના જણાવ્યા અનુસાર, આ કેનાલનું સમારકામ ગયા વર્ષે જ કરવામાં આવ્યું હતું. તેમ છતાં ચોમાસા દરમિયાન રસ્તો ધોવાઈ જવાની પરિસ્થિતિ ઊભી થઈ છે. ત્યારે સવાલ એ ઊભો થાય છે કે ગયા વર્ષે કરવામાં આવેલા સમારકામની ગુણવત્તા કેવી હતી? જો સમારકામ યોગ્ય રીતે કરવામાં આવ્યું હતું તો ફરી એકવાર રસ્તો ધોવાઈ જવાની નોબત કેમ આવી?
ખેડૂતોના જણાવ્યા મુજબ, હાલ રસ્તા પરથી પસાર થવું પણ મુશ્કેલ બન્યું છે. રોજિંદા ખેતીકામ માટે આ માર્ગનો ઉપયોગ કરતા ખેડૂતોને સમય અને મહેનત બંનેનો વધારાનો બોજ સહન કરવો પડી રહ્યો છે.
આ સમગ્ર મામલે કરજણ સંકુલની કામગીરી અને દેખરેખ સામે પણ સવાલો ઊભા થઈ રહ્યા છે. કારણ કે, ગયા વર્ષે સમારકામ કરવામાં આવ્યું હોવા છતાં જો ચોમાસામાં રસ્તાની આવી સ્થિતિ સર્જાય તો તેની જવાબદારી કોની? સમારકામની કામગીરી પૂર્ણ થયા બાદ તેની યોગ્ય તપાસ કરવામાં આવી હતી કે કેમ? તેમજ કામની ગુણવત્તા અંગે જવાબદાર અધિકારીઓ દ્વારા શું નિરીક્ષણ કરવામાં આવ્યું હતું?
બીજી તરફ, કોન્ટ્રાક્ટ પદ્ધતિ હેઠળ કામ કરતા મજૂરો અને સંબંધિત કર્મચારીઓ દ્વારા પણ આ સમસ્યાની ગંભીરતાને ધ્યાનમાં લઈને સ્થળ પર આવી પરિસ્થિતિનું નિરીક્ષણ કરવામાં આવતું ન હોવાની ખેડૂતોની ફરિયાદ છે.
જો રસ્તાની આવી હાલત છે તો તેની જાણકારી જવાબદાર તંત્ર સુધી પહોંચાડવાની અને જરૂરી કામગીરી કરાવવાની જવાબદારી કોની છે? શું ખેડૂતોની સમસ્યાઓનો ઉકેલ લાવવા માટે કોઈ જવાબદાર અધિકારી સ્થળ પર મુલાકાત લેશે કે પછી ખેડૂતોને આવી જ મુશ્કેલીઓનો સામનો કરવો પડશે?
એક તરફ સરકાર દ્વારા ખેડૂતોની સુવિધા અને સિંચાઈ વ્યવસ્થાને મજબૂત બનાવવાની વાતો કરવામાં આવે છે, ત્યારે બીજી તરફ કેનાલની આસપાસના રસ્તાઓની આવી સ્થિતિ ખેડૂતો માટે ચિંતાનો વિષય બની રહી છે.
ખેડૂતોનો પ્રશ્ન પણ વાજબી છે કે જ્યારે ગયા વર્ષે જ સમારકામ પાછળ ખર્ચ કરવામાં આવ્યો હતો, ત્યારે ફરીથી આ રસ્તો ધોવાઈ જવાની સ્થિતિ કેમ ઊભી થઈ? શું કામગીરીમાં કોઈ ખામી રહી ગઈ હતી? શું સમારકામની ગુણવત્તાની યોગ્ય તપાસ કરવામાં આવી હતી? અને જો બેદરકારી રહી હોય તો જવાબદાર સામે કાર્યવાહી કરવામાં આવશે કે નહીં?
હવે ખેડૂતોની માંગ છે કે કરજણ સંકુલના જવાબદાર અધિકારીઓ તાત્કાલિક આ સ્થળની મુલાકાત લે, રસ્તાની વાસ્તવિક પરિસ્થિતિનું નિરીક્ષણ કરે અને વહેલી તકે યોગ્ય ગુણવત્તા સાથે સમારકામ કરાવે, જેથી ખેડૂતોને અવરજવરમાં પડતી મુશ્કેલીઓમાંથી રાહત મળી શકે.
સાથે જ ગયા વર્ષે કરવામાં આવેલા સમારકામની પણ તપાસ કરવામાં આવે અને જો કોઈ ક્ષતિ કે બેદરકારી સામે આવે તો જવાબદારો સામે યોગ્ય પગલાં લેવામાં આવે.
હાલ તો કરજણ ડેમની જમણા કાંઠાની કેનાલ પાસે ધોવાઈ ગયેલો રસ્તો ખેડૂતો માટે મોટી સમસ્યા બની રહ્યો છે. ત્યારે જોવાનું એ રહેશે કે ખેડૂતોની આ રજૂઆત બાદ કરજણ સંકુલના જવાબદાર અધિકારીઓ ક્યારે જાગે છે અને ખેડૂતોની આ સમસ્યાનું નિરાકરણ ક્યારે આવે છે?
કેમેરા સમક્ષ ખેડૂતોની મુશ્કેલીની રજૂઆત અને કરજણ સંકુલની કામગીરી સામે ઊભા થતા સવાલો વચ્ચે હવે તંત્ર શું પગલાં ભરે છે તેના પર સૌની નજર રહેશે