સુરત : દિવાળી અને છઠ્ઠ પર્વ નિમિત્તે પોતાના વતન બિહાર જઈ રહેલા પરપ્રાંતિય શ્રમિકોને રેલવે સ્ટેશનો પર પડી રહેલી ભારે હાલાકી અને ભીડ મુદ્દે જાણીતા ચૂંટણી રણનીતિકાર તથા રાજકીય નેતા પ્રશાંત કિશોરે કેન્દ્ર સરકાર અને રેલવે તંત્ર સામે આકરા પ્રહાર કર્યા છે.

પ્રશાંત કિશોરે સોશિયલ મીડિયા પર વીડિયો જારી કરીને આક્ષેપ કર્યો હતો કે ગુજરાતમાં એક તરફ હજારો કરોડ રૂપિયાના ખર્ચે બુલેટ ટ્રેન દોડાવવામાં આવી રહી છે, જ્યારે બીજી તરફ ટિકિટ ખરીદીને મુસાફરી કરતા બિહારના શ્રમિકો ટ્રેનના દરવાજા અને શૌચાલયમાં બેસીને જવા મજબૂર બન્યા છે.

તેમણે વધુમાં જણાવ્યું હતું કે બિહારના યુવાનો દેશભરમાં રોજીરોટી માટે જાય ત્યારે તેમને હાલાકી ભોગવવી પડે છે અને ત્યાંના નેતાઓએ જનતાને મુર્ખ બનાવ્યા છે, જેથી લોકોએ આ સ્થિતિ વિરુદ્ધ જાગૃત થવાની જરૂર છે.

આ મામલે પ્રશાંત કિશોરના દાવાઓ સામે પશ્ચિમ રેલવે દ્વારા સત્તાવાર સ્પષ્ટતા કરવામાં આવી છે કે તહેવારોની મોસમમાં મુસાફરોની સુવિધા માટે વિશેષ આયોજન કરવામાં આવ્યું હતું અને સુરતના ઉધના જંક્શનથી ૧૧૧ જેટલી સ્પેશિયલ ટ્રેનો ઉપલબ્ધ કરાવવામાં આવી છે.

રેલવે તંત્રના જણાવ્યા અનુસાર, આ વિશેષ વ્યવસ્થાને કારણે અત્યાર સુધીમાં ૨.૭૦ લાખથી વધુ શ્રમિકો સુરક્ષિત રીતે પોતાના વતન રવાના થઈ ચૂક્યા છે, જેનાથી રેલવેને દસ દિવસમાં જ નોંધપાત્ર આવક પણ થઈ છે.

વધતી જતી ભીડને નિયંત્રિત કરવા અને મુસાફરોને સુવિધા પૂરી પાડવા માટે રેલવે વહીવટી તંત્ર દ્વારા આગામી દિવસોમાં પણ વિશેષ દેખરેખ અને વ્યવસ્થાઓ જાળવી રાખવામાં આવશે તેવી ખાતરી આપવામાં આવી છે.